Ыччат бэтэрээннэринэн киэн туттар

Бөлөххө киир:

От ыйын 1 күнүгэр Байыаннай дьайыылар бэтэрээннэрин күнэ бэлиэтэнэр. Бу саамай эдэр бырааһынньык Дьокуускайга эмиэ ыытыллан, “итии туочукаларга” байыаннай иэстэрин толорбут эр санаалаах дьоҥҥо дириҥ ытыктабылларын биллэрдилэр.

edersaas.ru

Бырааһынньык кыттыылаахтарын ортолоругар Саха Өрөспүүбүлүкэтин үтүөлээх юриһа, өрөспүүбүлүкэ бэтэрээннэрин сэбиэтин сэттис сылын салайар Вильям Очирович Иванов баар.

— Бу күн биһиги эр санаалаах уолаттарбытыгар тустаах наҕараадалары туттардылар. Байыаннай дьайыыларга сылдьыбыт уолаттарбыт дойдуларыгар кэлэн уопсастыба олоҕор, чуолаан ыччаты патриоттуу иитиигэ, көхтөөхтүк кытталларын бэлиэтиэм этэ. Сорох  дьон: “Бу бырааһынньык элбэҕэр эмиэ тугун эбии бырааһынньыгай?” диэн ыйыталлар. Ол гынан баран, юридическай өттүнэн көрдөххө,  барыта олохтоох. Арассыыйа Төрүт сокуонун  59-с ыстатыйатыгар доруобуйатынан кыанар хас биирдии эр киһи аармыйаҕа сулууспалыахтааҕын, дойдутун көмүскүүргэ  бэлэм буолуохтааҕын туһунан суруллан турар.  СӨ Үлэҕэ уонна социальнай сайдыыга министиэристибэтэ уонна хомуньуустар туруорсаннар, Арассыыйа үрдүнэн биһиэхэ эрэ “Сэрии оҕолоро” диэн араҥа баар буолла, сокуон ылыллан турар. Бу эмиэ оруннаах быһаарыныы. Мин 78 сааспын туоллум, эмиэ “сэрии оҕотобун”. 1970 сыллаахха Украина Харьков куоратыгар үөрэххэ киирбитим. 1974-76 сылларга Украинаҕа сулууспалаабытым, тимир суол өрөмүөнүгэр сылдьыбытым. Маннык бырааһынньык тэриллибитэ ыччаты патриоттуу тыыҥҥа иитиигэ туһалаах дии саныыбын. Ыччаттарбыт бүгүн манна кэлэн байыаннай дьайыылар бэтэрээннэрин кытары көрсөн, ирэ-хоро кэпсэттилэр, мэтээллэрин, уордьаннарын, наҕараадаларын тутан-хабан көрдүлэр. “Биһиги олохпутугар маннык дьоннордоох эбиппит, көмүскэллээх эбиппит” диэн эрэх-турах сананнахтара, — диэн санаатын үллэһиннэ.

«Саха сирэ», edersaas.ru

+1
0
+1
0
+1
0
+1
0
+1
0
+1
0
+1
0