Ыччат бэстибээлин саамай кыра саастаах кыттааччыта Амма кыыһа — Амгаяна
«MUUS uSTAR» ыччат бэстибээлигэр үҥкүү хайысхатыгар кытта диэн Амма улууһун Сатаҕайыттан 14 саастаах Амгаяна Ефимова кэлбит. Кини финалга тахсан баран үс иһигэр кыайан киирбэтэх. Амгаяна бу улахан бэстибээлгэ үҥкүүгэ уһуйар учууталын Анжела Дмитриевна Филиппованы кытта кэлбит.
— Мин Амма улууһун Сатаҕай орто оскуолатыгар О.П.Иванова-Сидоркевич эбии үөрэхтээһинин уһуйааччытынан уонна Е.А.Шишигин аатынан орто оскуолатыгар муусука учууталынан үлэлиибин. Биһиги оскуолабытыгар «Дьүрүскэн» этно-фольклорнай оҕо ансаамбыла баар. Бу ансаамбылы 2016 сыллаахха тэрийбитим. «Хомусчаан» диэн куруһуок иһинэн баар ансаамбыл. Манна уопсайа 30-тан тахса оҕо сылдьар. «Дьүрүскэн» этно-фольклорнай ансаамбылга сылдьар оҕолору чабырҕахха, норуот ырытыгар, сахалыы үнүстүрүмүөннэргэ, чуолаан хомуска, күпсүүргэ, уонна олоҥхоҕо уһуйабын. Ону таһынан, былырыыҥҥыттан үҥкүүгэ уһуйан саҕалаатым. Амгаяна Ефимова ахсыс кылааска үөрэнэр.
Ыччат бэстибээлин былырыын интэриниэт нөҥүө көрөн, быйыл кыттарга быһаарыммыппыт. Быйылгы 12 хайысхаттан үҥкүүнү талан, өрөспүүбүлүкэтээҕи үҥкүү куонкуруһугар кыттарга быһаарыммыппыт. Инньэ гынан холонон көрүөххэ диэн быһаарынан, Дьокуускайга кэлэн кытынныбыт. Бастакы туурга Амгаяна «Хомуһум үҥкүүтэ» диэни толордо. Онтон финалга киирээри “Олоҥхо дойдута” диэн саҥа үҥкүүнэн кытынныбыт. Фонограммабытын Василий Васильевич Татариновка-Хоту Уолаҥҥа оҥотторбуппут. Таҥаспытын Марфа Михайловна Шаринаҕа эскизтэтэн тиктэрбиппит. Амгаяна уопсайа 235 кыттааччы сүүмэрдэнэр тууругар кыттан, 109 кыттааччы иһигэр талыллыбыппытыттан үөрдүбүт аҕай. Манна хореограф-туруорааччы быһыытынан бэйэм эмиэ кытта сылдьабын. Куонкурус Сергей Зверев аатынан үҥкүү саалатыгар буолла. Маннык улахан сыанаҕа Амгаянабынаан бастакы тахсыыбыт буолар. Наһаа долгутуулаах түгэн этэ. Куонкуруска кыттан санаабыт көтөҕүлүннэ, идиэйэ бөҕөтө киирдэ. Куонкурус иккис тууругар Амгаяна саамай кыра саастаах кыттааччы этэ. Үксэ хореография идэтин баһылаары сылдьар устудьуоннар. Балет, муусука оскуолатыттан кытыннылар. Тэрээһин наһаа үрдүк таһымнаахтык ааста. Тэрийээччилэргэ махталбын биллэрэбин, — диэн Амгаяна салайааччыта Анжела Филиппова кэпсээтэ.
Бэлиэтээн суруйдахха, бэстибээл СӨ Бырабыыталыстыбатын уонна Росмолодежь тэрийиитинэн ыытыллар. Бэстибээл генеральнай партнердарынан “Эльгауголь” уонна “Якутия” авиахампаанньа, «Транснефть» тэрилтэлэр буолаллар. Оттон информационнай партнердарынан МУЗ-ТВ, Rutube, «ВКонтакте» ааттыыбыт.
Ульяна ЗАХАРОВА.