Аҕыйах хонуктааҕыта Сочи куоракка Аан дойдутааҕы ыччат бэстибээлэ буолан ааста. Тэрээһин историятын тухары Саха сириттэн уопсайа 11 хомусчут кыттыбыта биллэр.
edersaas.ru
Ол курдук, Аан дойдутааҕы Хомус түмэлин бэрэсидьиэнэ Иван Алексеев-Хомус Уйбаан иһитиннэрбитинэн, Варшаватааҕы 1953 сыллааҕы бэстибээлгэ аатырбыт ырыаһыт Анастасия Лыткина бара сылдьыбыт. Кини Захар Винокуров “Эҕэрдэ ырыатын” ыллаан, саха ырыатын аан маҥнайгынан тас дойдуга таһаарбыт.
1957 сыллааҕы Москваҕа буолбут тэрээһиҥҥэ саха хомусчуттарыттан аан бастакынан Харитина Устинова кыттыбыт. Оттон 1985 сыллааҕы бэстибээлгэ “Алгыс” хомусчуттар аҕыс киһилээх ансаамбыллара тиийбитэ биллэр. Итиэннэ быйылгы тэрээһиҥҥэ Хомус түмэлин уонна аан дойдутааҕы Хомус киинин тэрийэр үлэҕэ салаатын сэбиэдиссэйэ Эркин Алексеев, “Якутия” авиа-хампаанньа салаатын начаалынньыга, Дьокуускайдааҕы Гражданскай авиация техническэй училищетын преподавателэ, хомусчут Анна Саввина, ХИФУ устудьуона Алдан Рожин баран кэллилэр. Кинилэр ити сырыыларын түмүгүнэн, сэтинньи 2 күнүгэр Хомус түмэлигэр муусука салонун тэрийдилэр. Манна бэстибээл эдэр кыттааччыларын сэргэ, 1985 сыллаах бэстибээлгэ саха хомуһун дьиэрэһиппит хомусчуттартан биирдэстэрэ Хомус Уйбаан ыалдьыттаата. Тэрээһини дириэктэри солбуйааччы Дмитрий Бястинов иилээн-саҕалаан ыытта.
Сочига Саха сирин туһунан кэпсиир быыстапканы туруорбуттар. Манна атын экспонаттары сэргэ 12 улуус хомуһун илдьэн көрдөрүүгэ уурбуттар. Быыстапканы күннэтэ 2-3 тыһыынча киһи көрбүтүн бэлиэтииллэр.
Кинилэр хайдах сылдьыбыттарын эрэ кэпсээбэккэ, хомуһунан араас композициялары толорон иһитиннэрдилэр. Көрөөччүлэри оччотооҕу өбүгэлэрбит кэмнэригэр даҕаны “илдьэ” сырыттылар. Бу киэһэ мустубут дьон ыйытыыларыгар хоруйдаатылар, тус олохторуттан быһа тардан кэпсээтилэр. Икки чаас устата барбыт тэрээһин чыпчылыйыах бэтэрээ өттүгэр биллибэккэ ааста.
Түмүккэ Алдан Рожин Сочитааҕы бэстибээл кыттыылаахтарыгар анаан биэрбит таҥастарын (толстовка) Хомус түмэлигэр бэлэхтээтэ.
Людмила ПОПОВА, “Саха сирэ” хаһыат, edersaas.ru