Номнуо муус устар бүтэрэ кэллэ, ыам ыйа чугаһаата. Хаар ууллан чалбах халыйда, сылыйда. Эдэр киһи көрөрбүнэн, сыллата кэрэҕэ тардыһыы, бириэмэни туһалаахтык атаарыы үксүүр курдук. Хайыһардыыр баазаҕа сылдьыбыт ыччат дьоннуун кэпсэттим. Оттон эһиги сааһы баттаһа сноубордаатыгыт дуо?
Хотугулуу-Илиҥҥи норуоттар тылларын уонна култуураларын институтун устудьуона Света Борисова: «Сааһы олус таптыыбын. Халлаан күп-күөҕүнэн унаарбытын хас күн ахсын көрөммүн астынабын. Киэһэнэн дьыбарсыйар, түүнүн тымныйар да буоллар, муус устар ыйбын сэргэхтик атаарарга кыһалынным. Быйыл «Вираж» диэн хайыһардыыр баазаҕа бастакыбын сылдьан сөбүлээтим. Эһиил эмиэ хайаан да сылдьыахтаахпын, өссө холкутук сырылыырга үөрэнэрим курдук», — диэн кэпсээтэ.
Ырыаҕа ылламмыт, хоһооҥҥо хоһуллубут Амма сирин-уотун уола Илья Нектыров сэһэргээтэ: «Мин Аартыкатааҕы култуура уонна ускуустуба институтун устудьуонабын. Быйыл доҕотторбун кытта Төхтүргэ бастакыбын сноубордаабыппыт. Син сатаабытым, олус астыммытым».
ХИФУ-га эмчит идэтигэр үөрэнэр Лиза Филатова «Виражка» сылдьыбытыттан олус астынар: «Быйыл быыс булан, сааспын маннык хабааннаахтык киэргэппиппиттэн наһаа үөрэбин. Доҕотторбунуун эйэлээхпит, ханна эрэ барар буоллахпытына, бары күргүөмүнэн сылдьарга кыһаллабыт».
ХИФУ ДНД-тын актыбыыһа Ньургун Андреев: «Горнай институт 3 кууруһугар үөрэнэбин. Сноубордга бастакыбын былырыын Төхтүргэ сылдьаммын үөрэммитим. Доҕотторгун кытта бииргэ бириэмэ атаарбытыҥ, кэми тохтотон хаартыскаҕа, видеоҕа уһулбутуҥ умнуллубат түгэннэргэ кубулуйар буоллахтара. Эдэр саас саамай хатыламмат кэрэтэ, астыга онно сытар дии саныыбын», — диэн саха ньургун уола санаатын эттэ.
Дьэ, доҕоттор, аны ыам ыйа тосхойуо. Күөрэгэй ырыата дьырылыа, хаар халбарыйыа, мутукча сыта дыргыйыа, ньургуһун тоҥ буору тобулан тахсыа. Саас — биһиги, эдэр дьон курдук. Кини тыллар, чэбдигирдэр, санааны чэпчэтэр, инникигэ эрэли үөскэтэр. Салгыы да ыччат дьоҥҥо олох сырдык өттүн тутуһан сылдьарыгар баҕарабыт!