Саха Өрөспүүбүлүкэтин Ыччатын Бырабыыталыстыбата 2019-2020 сыллар түмүктэринэн Арассыыйаҕа бастыҥынан ааттанна. Маны сэргэ тэриллии РФ ыччат бырабыыталыстыбаларын ассоциацияларын XII сийиэһигэр бырайыагынан үлэҕэ бастыҥынан биллэрилиннэ.
«2019 сыллаахха ыччат бырайыагын бэлэмниир офиһа арыллыбыта. Манна ыччат идиэйэлэрин бырайыакка түмэргэ көмө оҥоһуллар», — диэн бэрэссэдээтэл Василина Лукина кэпсиир. Бу бырайыак хамаандата былырыын ыытыллыбыт «Проектный Олимп» федеральнай куонкуруска иккис миэстэни ылбыта.
«Биһиги толкуйдаабыт бырайыактарбыт ыччат дьыалаларыгар федеральнай ааҕыныстыба граҥҥа куонкуруһун, бэрэсидьиэн гранын пуондатын кыайыылааҕынан буолбуттара. Сорох бырайыактарбыт олоххо киирбиттэрэ, атыттар өссө даҕаны ситэриллэллэр. Сыллата бэйэбит тэриллиибит бырайыактарын таһынан атын ыччакка эмиэ көмөлөһөбүт», — диэн Василина салгыы иһитиннэрэр.
Итиэннэ тэрээһин кэмигэр СӨ Ыччатын бырабыыталыстыбатын бэрэссэдээтэлин Василина Лукинаны федеральнай ассоциация бэрэссэдээтэлин солбуйааччынан таллылар. Кини Уһук Илиҥҥэ баар ыччат бырабыыталыстыбаларын боппуруостарынан, Арктика сайдыытыгар ыччаты кыттыһыннарыыга үлэлэһиэҕэ.
edersaas.ru