Кыһыл Сыыр бөһүөлэгэр ааспыт үйэ 60-с сылларыгар бырайыактаммыт, 2001 сыллаахха тутуллубут оскуола хапытаалынай өрөмүөнүн бастакы түһүмэҕин “ЯТЭК” хампаанньа уонна “Новый дом” пуонда бүтэрдилэр. Сүүрбэ сыл иһигэр үөрэнэр кылаастар тиийбэттэрэ, инженернэй систиэмэлэрэ эргэрбиттэрэ бэлиэтэммит.
400 миэстэлээх оскуола дьиэтин аныгылыы бырайыагын дизайнын “Стрелка” тэрилтэ оҥордо. Үөрэх хаамыытыгар өрөмүөн үлэтэ мэһэйдиэ суохтаах, ол иһин 2 түһүмэххэ араардылар. Үлэ бастакы түһүмэҕэ 2,5 ый устата оҥоһулунна. Бу кэм иһигэр вентиляцияны, элэктэриичистибэни, уу ситимин, канализацияны уларыттылар, түннүктэри, кырыыһатын өрөмүөннээтилэр. Ону тэҥэ, киирэр ааны, тас истиэнэи киһи билбэт курдук уларытан, уруһуйунан киэргэттилэр.
Ис өттүгэр муостатын, истиэнэтин, үрдүн кырааскалаатылар. Маны тэҥэ, оскуолаҕа оҕолору таһарга оптуобуһу бэлэхтээн үөртүлэр.
“ЯТЭК” генеральнай дириэктэрэ Андрей Коробов эппитинэн, кэлэр сылга үлэ иккис түһүмэҕэ салҕаныаҕа. Ол курдук, оскуола тиэргэнин, материальнай-техническэй базатын саҥардыахтара, спортивнай комплекс тутуллуоҕа.
Онон Кыһыл Сыыр оскуолата тас өттүттэн эрэ буолбакка, ис өттүттэн эмиэ саҥалыы сандаарыаҕа, үөрэтии систиэмэтэ кытта уларыйыаҕа, оҕо сайдарыгар бары усулуобуйа оҥоһуллуоҕа.
Ангелина Васильева, “Саха сирэ” хаһыат, edersaas.ru
Хаартыска: sakhagov.ru