Кулун тутар 18 күнүгэр Ил Дархан Айсен Николаев суруналыыстары кытта көрсөн өрөспүүбүлүкэҕэ быһыы-майгы хайдаҕын билиһиннэрдэ.
edersaas.ru
«Коронавируска уорбаланааччы ЯТЭК генеральнай дириэктэрэ сабаҕалааһын быһыытынан, маннааҕы сулууспалар чахчыларынан коронавируһунан ыалдьыбыта бигэргэннэ. Ол эрээри Новосибирскай куораттан кэлэр анаалыс түмүгүн өссө да күүтэбит. Бу киэһээҥҥэ диэри биллиэ диэн эрэнэбит. Бырабыыталыстыба биир да чилиэнэ ЯТЭК дириэктэрин кытта алтыспатаҕа. Кулун тутар 11 күнүгэр көтөн кэлэн баран биир эрэ күн үлэлээбит. Үлэтин миэстэтигэр эрэ сылдьыбыта билиннэ. Кинини кытта алтыспыт дьон кимнээҕин быһаара сылдьаллар.Маны сэргэ, ЯТЭК дириэктэрин кэргэнэ уорбаланааччылар истэригэр баар. ЯТЭК хампаанньа үлэһиттэрэ бары тастан үлэлиир буолуохтара. Бүгүҥҥү туругунан Алдан, Нерюнгри, Өлүөхүмэ оройуоннарыгар коронавируска уорбаламмыт дьон анаалыстара вирус суоҕа бигэргэннэ», — диэн Ил Дархан санаатын үллэһиннэ.
Ульяна Захарова, edersaas.ru
Айтана АММОСОВА хаартыскаҕа түһэриитэ