Сүрүн Уопсастыба

«Ыарыыны тарҕаппат туһуттан, түргэн дьаһаныы ирдэнэр»

Өрөспүүбүлүкэтээҕи суһал ыстаап уочараттаах мунньаҕа буолла. Манна Ил Дархан Айсен Николаев кыттыыны ылла.

Олус сыстыганнаах вирус кэлбитинэн, билигин биир сүрүн ирдэбилинэн түргэнник дьаһаныы ирдэнэр. Онон чуолкай уонна түргэн быһаарыныылары ылынан, суһаллык олоххо киллэрэн иһиэххэ наада, — диэн кини эттэ.

Айсен Николаев улуустар, куорат уокуруктарын баһылыктарын нэһилиэнньэҕэ отчуоттары ыытары тохтоторго ыҥырда. Ыарыы сэтэрээбит сирдэригэр түргэнник дьаһана охсон, миэрэ ылыахтаахтар, быһыыны ылыы тэтимин бытаардыа суохтаахтар, дьон бары харыстанар ньыманы тутуһалларын ситиһиэхтээхтэр. Үөһэттэн ыйыыны кэтэспэккэ, үөрэх тэрилтэлэрин тэйиччиттэн үөрэххэ ыытар бырааптаахтар.

Ыраах сытар, суола-ииһэ суох нэһилиэктэр биэлсэр пууннара эминэн үчүгэйдик хааччыллыахтаахтар. 100 тыһыынча киһиэхэ хас киһи ыалдьарын быһаарбыттарынан, Саха сирэ дойду үрдүнэн 4-5-с миэстэлээх. Ыалдьар дьон 80%-ра Дьокуускайга бааллар. Оттон улуустары ыллахха, Мэҥэ Хаҥаласка, Алдаҥҥа, Хаҥаласка, Горнайга, Мииринэйгэ, Нерюнгригэ эпидемиологическай балаһыанньа уустук.

Коронавирус тарҕанарын уонна дьон ыараханнык ыалдьарын тохтотор ньыма – быһыыны биэрии. Бүгүҥҥү туругунан, өрөспүүбүлүкэҕэ улахан дьон 77%-на быһыыны ылбыт. Оттон ревакцинацияны 110 тыһыынча киһи ылбыт.

Ангелина Васильева, “Саха сирэ” хаһыат, edersaas.ru

Хаартыска: sakhagov.ru

0
1
Telegram @edersaas20