Ил Дархаммыт А.С.Николаев 2021 сылы өрөспүүбүлүкэҕэ Доруобуйа сылынан биллэрбитин аҕам саастаахтар үөрэ истибиппит. Маны таһынан, кини атын ыйааҕынан 2021-2030 сс. Чэбдигирии 10 сылынан биллэрбитэ. Бу барыта биһиги кырдьаҕастарбыт үйэлэрэ уһууругар көмөлөөх “Доруобуйа”, “Демография” Арассыыйатааҕы национальнай бырайыактарын чэрчитинэн үбүлэнэр уонна кэскиллээх дьыала.
СӨ доруобуйа харыстабылын миниистирэ Лена Афанасьева этэринии, “киһиэхэ саамай кылаабынайа – доруобуйата”, оттон эмчиттэр түмсүүлээх, байыаннай аҥаардаах дьон. Бирикээс, дьаһал кэллэ – толороҕун диирэ оруннаах. Миэдиктэр сокуон ирдэбилинэн байыаннай эбээһинэстээхтэр, мэдиссиинэ сулууспатын эрэллээх эписиэрдэрэ.
2021 сыл – Доруобуйа сылын түмүктэрин туһунан туоһулаһа, токоолоһо Доруобуйа харыстабылын министиэристибэтин штаты таһынан кылаабынай терапевт бырааһа Айталина Константиновна Тороноваттан сэһэргииригэр көрдөстүм.
— Дьаҥ төһө да мэһэйдээтэр, 2021 с. былааннаабыт тэрээһиннэрбитин барытын ыыттыбыт. Ону ситиһиибит дии саныыбын. Саха сиригэр “Доруобуйа”, “Демография” диэн Арассыыйатааҕы национальнай бырайыактар үчүгэйдик үлэлииллэр. Ыарыыны эмтиирдээҕэр сэрэтэр биһиги сүрүн сорукпут. Маныаха “диспансеризация” көрдөбүлэ көдьүүстээҕэ көһүннэ. Ол курдук, 18-39 саастаах нэһилиэнньэ араҥатын үс сылга биирдэ, 40 саастарын туолбут пациеннары сыл аайы булгуччулаах мэдиссиинэ чинчийиитинэн хабыахтаахпыт. 2021 сыл түмүгүнэн диспансернай учуокка 40 тыһыынчаттан тахса ыарыһахтары туруордубут. Арассыыйа Доруобуйа харыстабылын министиэристибэтин бирикээһигэр олоҕуран профкөрүүлэр, ковид-19 дьаҥынан ыалдьыбыт дьону чөлүгэр түһэриигэ эмтээһин, нэһилиэнньэни чөл олох иһин охсуһууга, уһун үйэлээх буолууга “Демография” бырайыакка олоҕуран иитии-үөрэтии былааннара улахан дьоҥҥо туолбуттара.
Доруобуйа сылыгар маҥнайгы сүһүөх тымыр салааларын Ленскэйгэ уонна Майаҕа эмтиир баазаларыгар билиҥҥи ирдэбилгэ эппиэттиир оборудованиеларынан толору хааччылыннылар.
Нэһилиэнньэни чэгиэн-чэбдик, чөл олох иһин охсуһалларыгар, табаҕы быраҕар, арыгынан үлүһүйүүнү тохтотор, уһун үйэлэниигэ угуйар араас тэрээһиннэри ыыттыбыт. 14 оройуоҥҥа үгүс өрүттээх бырагыраамалары олоххо киллэрдибит.
21-с үйэ мэдиссиинэ балысхан сайдыытыгар тириэрдэр соруктааҕын күннэтэ киин бэчээт, интэриниэт, араадьыйа нөҥүө билсэн, истэ олоробут. Нэһилиэнньэ инникигэ эрэллээх санаалаах, көхтөөх араҥата “үрүҥ халааттаах аанньалларбытыгар” күүс-көмө, тирэх буолан, Ил Дархаммыт ылыммыт “Чэбдигирии 10 сылын” ыйааҕын бииргэ сомоҕолоһон, сэҥээрэн, сэргээн, олоххо киллэрэргэ көмөлөһүөҕүҥ диэн ыҥырабын. Устуоруйа кэрэһилииринэн, Сэбиэскэй Сойуус кэмнэригэр үс куттаах саха аймах уһун үйэлээхтэр ахсааннарынан үһүс кэрдиискэ буоларбыт.
Григорий Михайлов-Дьулҕан.
Хаартыскаҕа: А.К.Торонова.