Доруобуйа Маны аах

Ыарыы туһунан иһитиннэрии кырдьыктаах буолуохтаах

Дьокуускайга коронавирус инфекциятын саҥа штаммын сэрэтии уонна эмтэнии дьаһалларын өрөспүүбүлүкэ нэһилиэнньэтигэр сөптөөхтүк тириэрдии боппуруоһугар сэминээр ыытылынна.

Билиҥҥи кэмҥэ олус наадалаах дьаһалы СӨ Уопсастыбаннай балаататын доруобуйа харыстабылыгар, физическэй култуураҕа уонна успуорка хамыыһыйата тэрийдэ.
Билигин мэдиссиинэ уопсастыбаннаһын сүрүн соругунан нэһилиэнньэ доруобуйатын туруга буолар.

Наркология өрөспүүбүлүкэтээҕи диспагсеоын кылаабынай бырааһа, СӨ Уопсастыбаннай балаататын доруобуйа харыстабылыгар, физическэй култуураҕа уонна успуорка хамыыһыйатын бэрэссэдээтэлэ Альбина Сивцева салайан ыыппыт сэминээр-мунньаҕар СӨ доруобуйа харыстабылын миниистирин солбуйааччы Любовь Бурнашева, СӨ Судаарыстыбаннай мунньаҕын (Ил Түмэн) дьокутааттара, СӨ Роспотребнадзор управлениетын бэрэстэбиитэллэрэ, мэдиссиинэ уопсастыбатын исписэлиистэрэ, сонуну киэҥник тарҕатар сириэстибэлэр бэрэстэбиитэллэрэ кытыннылар.

СӨ Доруобуйа харыстабылын министиэристибэтин штаты таһынан кылаабынай пульмонолога Аграфена Аргунова, СӨ Доруобуйа харыстабылын министиэристибэтин штаты таһынан кылаабынай эпидемиолога Марианна Данилова, СӨ Доруобуйа харыстабылын министиэристибэтин штаты таһынан кылаабынай терапева Айталина Торонова өрөспүүбүлүкэҕэ коронавирус саҥа инфекциятыгар бэйэлэрин көрүүлэрин билиһиннэрдилэр.

Оҕоҕо быһыыны биэриини, пандемиянан  сибээстээн мэдиссиинискэй институттар үөрэтэр бырагыраамаларга уларыйыылары, мэдиссиинискэй каадырдар тиийбэттэрин, эминэн хааччыллыыны, коронавирус инфекциятын быһаарарга социальнай ситимнэринэн тарҕанар, көҥүлэ суох экспресс-тиэстэр кутталларын кытары сибээстээх боппуруостары дьүүллэстилэр.

Кыттааччылар сонуну киэҥник тарҕатар сириэстибэлэр иһитиннэриилэрэ кырдьыктаах, дьиҥнээҕи тутуһар, баар  төрүөккэ олоҕурбут, сүрүнэ —  дьон доруобуйатын харыстабылыгар анаммыт буолуохтааҕын бэлиэтээтилэр.

Надежда ЕГОРОВА, «Саха сирэ», edersaas.ru

 

2
0
Telegram Whatsapp