Бүгүн киэһэ өрөспүүбүлүкэҕэ коронавирус балаһыанньатын вице-премьер Ольга Балабкина быһа эфиргэ тахсан кэпсээтэ.
edersaas.ru
Ольга Валерьевна этэринэн, өрөспүүбүлүкэҕэ үрдүк бэлэмнээх буолуу эрэсиимэ оннунан хаалар. Билиҥҥи туругунан, 15 ыарыһах баара бэлиэтэннэ, итинтэн 4-дэ үтүөрдэ. Инфекционнай балыыһабытыгар 11 киһи салгыы эмтэнэ сытар. Билиҥҥитэ эмтэниилэрэ этэҥҥэ баран иһэр, бэргээһин бэлиэтэммэтэх. Маны сэргэ өрөспүүбүлүкэ 4 оройуонугар, ол иһигэр Дьокуускайга дьиэттэн тахсыбакка олоруу эрэсиимин биллэрбитэ. Дьокуускай баһылыга С. Авксентьева мунньахха иһитиннэрбитинэн, оптуобустарга дьон айаннааһына аччаабыт. Мииринэй баһылыга эмиэ итинник эппит. Ол оннугар Мииринэйгэ хампаанньалар анал массыыналара сүүрэллэр. СӨ Ил Дархана Айсен Николаев коронавируһу утары хас да Ыйааҕа эбиилээх, уларыйыылаах тахсан, дьаҥы утары миэрэлэри өссө күүһүртэ.
— Бүгүн саҥа эрэдээксийэлэммит Ыйаах илии баттаныаҕа.СӨ баһылыга эппитин курдук, атын эрэгийиэнтэн кэлбит дьон 14 күн дьиэттэн тахсыбакка олоруохтаахтар, атын субъектан атын субъекка айаннаан кэлбиттэрин быһыытынан. Бу баахтаҕа уонна эбийиэктэри тутууга кэлэр дьоҥҥо эмиэ сыһыаннаах. Бу күннэргэ социальнай көмүскэл үлэһиттэригэр уонна эмчиттэргэ ыҥырыы элбээтэ. Суһал штаб мунньаҕар бу сарсыарда Ыччат миниистирэ иһитиннэрбитинэн, күҥҥэ волонтердар 500-кэ ыҥырыы, көрдөһүү туталлар. Кинилэр аҕам саастаах дьоҥҥо көмөлөһөллөр.
Суһал штабка Биэнсийэ пуондата иһитиннэрбитинэн, хоту оройуоннарга уонна Дьокуускай куоракка биэнсийэни болдьоҕун иннинэ төлөөһүн ыытылынна. Ол эрээри Дьокуускайга сорох биэнсийэлээхтэр почтаттан биэнсийэлэрин бэйэлэрэ баран ылааччылар бааллар. Онон бу дьон дьиэттэн тахсыбаттарын курдук дьаһаныы ыытыллар. Оҕолоохторго төлөбүрү эмиэ кэмигэр төлүөхпүт, — диэтэ Ольга Балабкина.
Онон өрөспүүбүлүкэҕэ улахан дьаҥы утары үлэ күүскэ бары хайысханан ыытыллар. Олохтоохтор, дьон-сэргэ бары ыйыыны-кэрдиини истиэхтээхпит.
Женни СТРЮКОВА, “Саха сирэ” хаһыат
Ааптар хаартыската.