Өрөспүүбүлүкэҕэ эпидемиологическай балаһыанньа туругун иһитиннэрии күннээҕи брифинин кэмигэр СӨ Доруобуйатын харыстабылын миниистирэ Елена Борисова: “Төһө даҕаны ыарыы намтаабыта бэлиэтэнэрин иһин, балаһыанньа билигин даҕаны тыҥааһыннаах”, — диэн эттэ.
Кэлиҥҥи суукка устата Саха сиригэр 194 киһи хамсык дьаҥар сыстыбыт. Итинтэн Дьокуускайга – 84, Мииринэйгэ – 20, Мэҥэ Хаҥаласка – 14, Алдаҥҥа – 12, Нерюнгрига – 10, онтон атын 17 улууска бииртэн алтаҕа диэри киһи ыалдьыбыт.
Ыарыы саҕаланыаҕыттан бэлиэтэммит ыарыһах дьон ахсаанын 78 бырыһыана үтүөрбүт. “Тыһыынчаттан арыый аҕыйах киһи балыыһаҕа сытар. Куойкалары сыыйа аҕыйатабыт, ол эрээри, ханнык баҕарар кэмҥэ эбиллэн хаалыа диэн син биир эрэсиэрбэҕэ тутабыт.
Төһө даҕаны ыарыы намтаабыта бэлиэтэнэрин иһин, балаһыанньа билигин даҕаны тыҥааһыннаах. Ордук бырааһынньык иннинээҕи, атыы кииннэригэр үгүстүк сылдьар күннэрбитигэр харыстаныы бары миэрэлэрин тутуһар ирдэнэр”, — диэн миниистир бэлиэтээтэ.
Билиҥҥитэ нэһилиэнньэ ирдэбилинэн күҥҥэ 2000 анаалыс оҥоһуллар.
“Саха сирэ” хаһыат, edersaas.ru