Бүгүҥҥү брифиҥҥэ Роспотребнадзор Саха сиринээҕи салаатын салайааччытын солбуйааччы Изабелла Самойлова кытынна.
Кини бүгүҥҥү туругунан, 88 киһи ыарахан дьаҥҥа хаптарбытын аҕынна. Чуолаан, оройуоннарга ыарыы тарҕаныытын бэлиэтээтэ. Ол курдук, Мэҥэ Хаҥалас – 14, Таатта – 5, Ньурба – 3, Хаҥалас – 2 киһи ыалдьыбыт. Ону сэргэ Алдаҥҥа, Кэбээйигэ, Мииринэйгэ, Чурапчыга – биирдии киһи ыалдьыбыта бигэргэммит.
Изабелла Юрьевна бэлиэтииринэн, ыалдьыы элбээн иһэр. Сааскы сезон кэмигэр ыалдьыы элбээбитинэн Дьокуускай куоракка 5-8 кылаастар үөрэнээччилэрин тэйиччиттэн үөрэтэргэ санитарнай быраас этии киллэрбитин эттэ.
Маассабай быһыыны биэрии салҕанар. Сүрүн болҕомто кырдьаҕастарга ууруллар. Доруобуйа харыстабылын министиэристибэтэ куойка-миэстэ ахсаанын элбэппитин эттэ. Ону тэҥэ ПЦР-тиэстээһини оҥоруу ахсаана элбээбит. Түмүгэр кини бары харыстанар миэрэлэри тутуһарбытыгар, элбэх дьон тоҕуоруһар сиригэр сылдьартан туттунарга сүбэлээтэ.
Женни Стрюкова.