Кэнники сылларга биһиги дойдубутугар ыарыыны сэрэтэргэ уонна эмтэнэргэ хас биирдии киһиэхэ тус-туһунан сыһыан (персонализированнай мэдиссиинэ) суолтатын туһунан кэпсэтии кэҥиир.
edersaas.ru
Дьэ, бу маннык өҥөнөн билигин Саха сирин олохтоохторо Өрөспүүбүлүкэтээҕи 3-с №-дээх клиническэй балыыһа персонализированнай мэдиссиинэтин киинигэр туһаныахтарын сөп. Персонализированнай киин хаан баттааһынын намтатар эмтэри, холестерины түһэрэр статиннары, саахары аҕыйатар препараттары, инфарктаабыт, ишемическэй инсуллаабыт дьон атеросклеротическай кэһиллиини сэрэтэр уо.д.а. эмтэри төһөнү иһиэхтэрин сөбүн быһаарар өҥөнү босхо оҥорор. Ону сэргэ, сэлликтээх уо.д.а. ыарыһахтар изониазид, ыарыыны намыратар препараттары төһөнү иһиэхтээхтэрин эмиэ босхо быһаартарыахтарын сөп.
Персонализированнай мэдиссиинэ киинин салайааччы Яна Чертовских быһаарбытынан, утумунан бэриллэр түөс араагын сэрэтиигэ соторутааҕыта Ыарыыны сэрэтэр киини кытары холбоһуктаах бырайыагы үлэлэппиттэр. Араак ыарыылаахтар күүстээх эмтэри уонна химиотерапияны туһаныах иннинэ төһө тулуйан иһэр кыахтаахтарын быһаарар өҥөнү олус интэриэһиргээтилэр. Онон, анаммыт эмп ыарыһахха төһө сөп түбэһэрин эрдэттэн билэригэр уонна үбүн-харчытын таах ыыппатыгар көмөлөһөрө саарбаҕа суох.
Эмтэнээччилэргэ табыгастаах буоларын туһугар өрөспүүбүлүкэ улуустарыттан эмтэнээччилэр балыыһаҕа туттарбыт биоматырыйалларын (анаалыстарын) эмтиир быраастарынан Персонализированнай мэдиссиинэ киинигэр ыытыахтарын сөп. Ол эбэтэр, киин куоракка кэлэ-бара сатаабакка, дьиэлэригэр олорон быһаартаралларыгар кыах бэриллэр.
Манна даҕатан эттэххэ, Кииҥҥэ төлөбүрдээх өҥөлөр эмиэ оҥоһуллаллар. Холобур:
— Эдэр уонна 60 саастарын ааспыт дьахталлар ханнык гормональнай терапия, оҕо үөскэппэт уонна солбуйар терапия сөп түбэһэрин таллараллар;
— Эмиий, яичник уонна тыҥа араактара, хаан баттааһына, сүрэх ишемията, саахарынай диабет, уойуу уо.д.а. ыарыылар утумунан төһө бэриллиэн сөптөрүн бэрэбиэркэлэтэллэр;
— Спордунан дьарыгы саҕалыан баҕалаахтар анаалыстары туттаран, спорт ханнык көрүҥнэригэр сыһыаннаахтарын чопчулаталлар.
Персонализированнай мэдиссиинэ киинэ маннык аадырыска үлэлиир:
Дьокуускай куорат, Киров аатынан уулусса, 34 дьиэтэ. Өрөспүүбүлүктээҕи 3-с №-дээх поликлиника дьиэтэ.
Исписэлиистэр 08.30-16.00 диэри көрөллөр.
Надежда ЕГОРОВА, «Саха сирэ», edersaas.ru