Биллэрин курдук, рейтиннээх түһүлгэлэргэ ыйааһын аайы биир дойдуттан үстүү бөҕөс кыттара көҥүллэнэр. Оннук күрэхтэһиилэр ахсааннарыгар киллэриллибит “Ярыгин турнирын” тэрийэн ыытар Арассыыйаҕа бастаан утаа ыйааһын аайы биэстии тустуугу кытыннарарын көҥүллээбиттэрэ. Оттон бэҕэһээ биллибитинэн, UWW судьуйаларга бырагырааматыгар Арассыыйаттан ыйааһыҥҥа биэс киһини кыайан киллэрбэтэхтэринэн, бастакы нүөмэртэн ураты түөрт бөҕөс салгыы күрэхтэһэр инниттэн икки путевканы былдьаһыахтара диэн буолла. Бу туһунан WRESTRUS.RU иһитиннэрдэ.
Онон бүгүҥҥүттэн саҕаланар күрэхтэһиигэ 57 киилэҕэ диэри ыйааһыҥҥа Заур Угуевы сэргэ Арассыыйаттан тустар быраабы ылар туһуттан Хуреш-оол Дондук-оол (Тыва) уонна Расул Машезов (КБР) , Азамат Тускаев (РСО-Алания) уонна саха тустууга оскуолатын иитиллээччитэ Семен Владимиров күөн көрсүөхтэрэ.
61 киилэҕэ диэри ыйааһыҥҥа бастакы нүөмэринэн Гаджимурад Рашидов буолар. Оттон кимнээх иккис, үһүс нүөмэринэн буолуохтара Исмаил Мусукаев уонна Рустам Абдурашидов, Александр Богомоев уонна Юлиан Гергенов хапсыһыыларын түмүгүнэн биллиэҕэ.
70 киилэҕэ диэри ыйааһыҥҥа Арассыыйа чиэһин Исраил Касумов уонна Магомед Курбаналиев көмүскүөхтэрэ. Үһүс киһинэн ким тустуоҕун Магомедрасул Газимагомедов уонна Абдуллагаджи Магомедов бэйэлэрин икки ардыларыгар быһаарсыахтара.
Хапсыһыылар Дьокуускай бириэмэтинэн күнүс 12 чаастан саҕаланаллар.
Роман Попов, “Саха сирэ” хаһыат, edersaas.ru