Амбулаторияҕа сыстыганнаах дьаҥҥа хаптаран эмтэнэр ыарыһахтарга анаан өрөспүүбүлүкэ босхо тарҕанар эми эбии атыыласта.
Бу эмтэри улуустардааҕы балыыһалар поликлиникаларыгар уонна хотугу улуустарга ыыттылар.
Ил Дархан Айсен Николаев тохсунньу 21 күнүнээҕи сорудаҕынан, “резервнэй” дэнэр пуондаттан 170 мөлүйүөн 970 тыһыынча солкуобай тыырылынна. 30 888 устуука «Фавипиравир», 29 376 устуука «Умифеновир» 13,5 тыһ. устуука парацетамол уонна 45 тыһ. «Интерферон альфа-2b» мурун хаапылата ыарыыны эмтииргэ туттуллуохтара.
Босхо эмптэри поликлиникаттан, оройуоннааҕы киин балыыһаттан, олохтоох амбулаторияттан, ону тэҥэ Дьокуускайга «Триумф» кииҥҥэ аһыллыбыт амбулаторнай көмөнү оҥорор пуунтан эмтиир быраас анааһынынан ылыахха сөп.
Дьаҥынан ыалдьыбыт дьоҥҥо босхо эмп тиксибэтэх буоллаҕына, 122 нүөмэргэ эрийэн билсиэххэ сөп. Улуустарга олорор дьон 8-800-100-14-03 босхо эрийэҕит.
Елена ПОТОЦКАЯ, “Саха сирэ” хаһыат, edersaas.ru