Тыйаатыр таҥас ыйыыр сиртэн саҕаланар буоллаҕына, ыарыһах киһи балыыһаҕа сырыыта кинини регистратор хайдах көрсөрүттэн саҕаланар. Оттон «Эмчит кэбиниэтигэр кинини быраас хайдах көрсөрүттэн, көрөрүттэн-истэриттэн ыарыһах туруга тутулуктанар» диэн мээнэҕэ эппэттэр. Онон, «Эйэҕэс-сайаҕас доруобуйа харыстабыла» бырайыагы эмтиир тэрилтэлэргэ киллэрэр туһунан СӨ Доруобуйа харыстабылын бирикээһэ тахсыбыта мээнэҕэ буолбатах.
Надежда ЕГОРОВА, «Саха сирэ» хаһыат, edersaas.ru
Олунньу 6 күнүгэр СӨ доруобуйа харыстабылын миниистирэ Михаил Охлопков «Эйэҕэс-сайаҕас доруобуйа харыстабыла» уонна үрдүк технологиялаах медицинскэй көмө боппуруостарыгар брифинг ыытта.
Ол бирикээскэ эмчит ыарыһаҕы көрөрүгэр тустаах эбээһинэстэрэ ыйыллыбыттар. Ол быһыытынан, үрүҥ халааттаах аанньал ыарыһахха төһө кыалларынан үчүгэй усулуобуйаны олохтуохтаах, хаачыстыбалаахтык көрүөхтээх, барыларыгар биир тэҥник уонна тулуурдаахтык сыһыаннаһыахтаах. Ыарыһаҕы сааһыттан уонна социальнай балаһыанньатыттан тутулуга суох «Вы» диэн ыҥырыахтаах. Ыарыһах киирэн олордоҕуна, эмчит кинини кытары эйэҕэстик кэпсэтэн, боппуруоһу икки өттүгэр табыгастаах буоларын курдук быһаарарга кыһаллыахтаах.
Оттон төлөпүөннээбит киһини кытары кэпсэтэргэ, иһитиннэриини ыларга эмиэ атын быраабылалар киллэриллибиттэр.
Аан бастаан эмчит тас көстүүтүгэр болҕомто ууруллубута эмиэ сэргэхситэр. Ол курдук, кини үрүҥ халаттаах аанньал буоларынан, лоп-бааччы көстүүлээх, ыраас, чэнчис буолуохтаах. Таҥаһыгар бейджик иилинэ сылдьыахтаах, санитарнай гигиена нуормаларын тутуһуохтаах уо.д.а.
«Эйэҕэс-сайаҕас доруобуйа харыстабыла» бырайыагы күннээҕи олоххо киллэрии туһунан эмтиир тэрилтэлэр 2016 сыл ахсынньытыгар отчуоттаабыттара. Идэ стандартарын толорууга бэрэбиэркэлэр хаста да ыытылыннылар. Ол түмүгүнэн, ыарыһаҕы кытары төлөпүөнүнэн кэпсэтии алгоритмнарын ситэри баһылыы иликтэрэ, эмчит майгыта-сигилитэ ардыгар ыарыһаҕы хааччыйыы быраабылаларыгар сөп түбэспэтэ ыйыллыбыттара.
Онон, медицинскэй үлэһит ханнык быраабылаларынан сирдэтиэхтээҕэр чопчу өйдөбүл баар буолла. «Эйэҕэс-сайаҕас доруобуйа харыстабыла» бырайыагы олоххо киллэрии туһунан» бирикээһи толорор наадаттан, 2017 сылга кэккэ эмтиир тэрилтэлэргэ бэрэбиэркэлэри ыытыы былааннанар. Ону таһынан, эмтиир тэрилтэлэр тас көрүҥнэригэр олохтоммут стандартары тутуһалларын көрдөрөллөрүгэр, хаартысканан отчуоттары ыытар буолуохтара.
Надежда ЕГОРОВА, «Саха сирэ» хаһыат, edersaas.ru