Ыарыһах оҕоҕо аһымал аахсыйа сонун көрүҥэ
Олох-дьаһах

Ыарыһах оҕоҕо аһымал аахсыйа сонун көрүҥэ

Кырачаан түөрт  саастаах Евва Васильева ДЦП ыарыылаах буолан, Кытайга эмтэнэ барарыгар харчынан көмөлөһөөрү «Понаехали» эрэстэрээн аһымал аахсыйаны ыытта.

edersaas.ru

Официаннарынан өрөспүүбүлүкэҕэ ааттаах-суоллаах биллэр дьон балтараа чаас устата үлэлээтилэр. Ол курдук, волонтёр Антон Васильев, «Якутия 24» телесуруналыыһа Анастасия Кобызева,

СӨ Нуучча общинатын уонна «Подросток» уопсастыбаннай тэрилтэ салайааччыта Александр Подголов,

СӨ Эргиэн бырамыысыланнай балаататын салайааччыта, Ил Түмэн дьокутаата Владимир Членов,

СӨ предпринимательство уонна туризм дьыалатын миниистирин солбуйааччы Максим Прокопьев,

аатырбыт спортсмен Николай Матаннанов, «Көмүлүөк» фирма дириэктэрэ Ольга Григорьева бу киэһэ эрэстэрээҥҥэ кэлбит ыалдьыттар сакаастарын толордулар, кэккэ куонкуруска күөн көрүстүлэр.

Официант курдук, бастаан көрдөххө судургу курдугун иһин, олус уустук идэни кылгас кэм иһигэр баһылааһыҥҥа биллиилээх спортсмен Николай Матаннанов инники күөҥҥэ тахсан, «Понаехали» эрэстэрээн Кубогын ылла!

Чиновниктар уонна уопсастыбанньыктар күөн-күрэстэрин дьүүллүүр сүбэтигэр ыҥырыылаах суруналыыстар уонна блогердар киирдилэр. Кинилэр бастыҥ официаны талар куонкурус кыттыылаахтарын талыыга хас биирдиилэрин кыраҕытык кэтээтилэр, үөрэттилэр.

Эрэстэрээн биир киэһээҥҥи дохуота уонна официаннарга бэриллибит «чаевой» харчы кырачаан Евва Васильева эмтэнэ барарыгар бэриллиэҕэ.

Сулус-официаннар 26 тыһ 400 солк харчыны «чаевой» быһыытынан хомуйдулар.

Куонкуруска кыттыбыт СӨ предпринимательство уонна туризм дьыалатын миниистирин солбуйааччы Максим Прокопьев санаатын маннык үллэһиннэ:

Бу иннинэ мин аска-үөлгэ сыһыаннаах куонкурустарга кытта илигим. Онон сонун хайысхалаах тэрээһин буолла. Официант  өҥө оҥорор идэлэртэн биирдэстэрэ. Ылбычча киһи үлэлээбэт идэтэ эбит. Ол ону  бэйэбинэн биллим. Тэрийээччилэргэ, кылгастык да буоллар, маннык идэни чугастык билиһиннэрбиттэригэр истиҥ махталбын тиэрдэбин. Тэрээһин аһымал аахсыйа буоларын билэн, ис сүрэхпиттэн кыттыыны ыллым. Кырачаан Евва Васильева үтүөрэрин туһугар сэмэй кылааппын киллэрдим дии саныыбын. 

Оттон «Бастыҥ официант» аатын ылан, «Понаехали» эрэстэрээн Кубогар тиксибит Николай Матаннанов санаата бу курдук:

Интэриэһинэй тэрээһин. Хайдах үлэлиирбин билбэт этим, онуоха уопуттаах официаны эрдэттэн сыһыаран, ол киһим миэхэ сүбэ-ама биэрэн, кыайыыга сирдээтэ. Санаабар, официанныыр судургу буолуо дии саныырым да, уустук идэ эбит. Үтүө санааттан дьоҥҥо туһалааҕы оҥорорго дьулуһар буолан,  оҕоҕо анаммыт аһымал аахсыйаҕа кыттарга ыҥырбыттарыгар тута сөбүлэспитим. Бастыҥ официант аатын ылан соһуйдум, кыргыттар бастыылларыгар эрэллээх этим. Маннык аһымал аахсыйаны тэрийдэхтэринэ, өссө да кыттар буолуоҕум.

Ити курдук, кырачаан Евва Васильеваҕа анаммыт аһымал аахсыйа  биһиги аттыбытыгар баар ыарыһах кырачааннарга көмө, өйөбүл биир үтүө сүүрэнинэн буолла.

Елена ПОТОЦКАЯ, «Саха сирэ» хаһыат, edersaas.ru

Хаартыска — ааптар түһэриитэ.

1
0

Сайт матырыйаалларын ааптар көҥүлэ суох ылар бобуллар.

Ваш адрес email не будет опубликован.

3 × один =