СӨ култууратын үтүөлээх үлэһитэ Ирина Егорова салайааччылаах «Ярилов день» үҥкүү норуодунай ансаамбыла улахан ситиһиилэннэ. Москваҕа Арассыыйа норуоттарын Ассамблеята Улуу Кыайыы 75 сылыгар анаан тэрийбит видеороликтар күөн күрэстэригэр кыттаннар, 1 истиэпэннээх дипломунан наҕараадаланнылар.
Күөн күрэскэ бу ансаамбыл үлэтин А.Е.Кулаковскай аатынан норуоттар доҕордоһууларын дьиэтин генеральнай дириэктэрин бастакы солбуйааччы Розалия Колосова көҕүлээн ыыппыт. Бу туһунан пресс-сулууспа бэлиэтиир.
Видеороликка номох буолбут «Синий платочек» ырыанан үҥкүү толоруллубут. Манна даҕатан эттэххэ, бу ырыаҕа туойуллар күөх былаат, оччотооҕу фронтовиктарга, тыыл үлэһиттэригэр ураты күүһү биэрбитинэн, уҕараабат тапталы, эрэллээх буолууну сахпытынан биллэр. Бу ырыа хас биирдии саллаат сүрэҕэр истиҥ иэйиини уһугуннарбыта, Улуу Кыайыыны уһансыбыта. Ансаамбыл ролигар «Синий платочек» ырыаны үтүөкэн Клавдия Шульженко уонна кэрэ Алсу ыллыыллара киллэриллибит. Маныаха бу көлүөнэлэр быстыбат ситимнэрин көрдөрөр диэн ансаамбыл кыттыылаахтара бэлиэтииллэр.
Роликка 25-55 саастаах дьон, уопсайа 25 киһи кыттыбыт. Дьиэҕэ хааччахтанан олоруу кэмэ да буолбутун иһин, ансаамбыл хас биирдии чилиэнэ ис сүрэҕиттэн долгуйан туран кыһамньытын уурбут, кылаатын киллэрсибит. Ролигы хайдах быһыылаахтык оҥорору Ирина Егорова толкуйдаабыт. Оттон олоххо киллэрэргэ ансаамбыл солистката Татьяна Ротарь көмөлөспүт. «Жди меня» хоһоону Дмитрий Ротарь олус долгутуулаахтык аахпыт. Ансаамбыл солиһа Артем Нечаев туох баар кыһамньытын ууран кыттыбыт. Биир тылынан, Яриловецтар бары ис сүрэхтэриттэн туох баар болҕомтолорун уурбуттар!
—Уоттаах сэриигэ хас биирдии буойун хорсун быһыыта, Ийэ дойдуну фашистартан босхолуурга олоҕун толук уурарын кэрэйбэккэ эйэ иһин охсуһуута хас биирдиибит сүрэхпитигэр хаһан да сүппэттии иҥмитэ. Оттон биһиги — эйэлээх олоҕу уһансыбыт бары ытык дьоммутугар сүгүрүйэбит. Ис дууһабытыттан иэйэн туран оҥорбут видеороликпыт дьүүллүүр сүбэ үрдүк сыанабылын ылбытыттан, 1 истиэпэннээх дипломунан наҕараадаламмыппытыттан наһаа үөрдүбүт. Бу ситиһиибит биһигини үлэбитигэр өссө үрдүккэ дабайарга кынаттыыр, — дииллэр ансаамбыл кыттыылаахтара.
«Ярилов день» ансаамбыл аатыттан ситиһиилэринэн эҕэрдэлээбит бар дьоҥҥо махтаналлар.
