Өрөспүүбүлүкэҕэ пандемиянан сибээстээн балаһыанньа уустугурбутунан, Саха сиригэр олунньу 1 күнүгэр диэри испэктээкиллэр, кэнсиэртэр уонна да атын култуура дьаһаллара ыытыллаллара тохтотулунна.
edersaas. ru
СӨ култуураҕа уонна духуобунай сайдыыга миниистири солбуйааччы Марина Силина эппитинэн, салгыы хайдах быһаарыллара эпидемиология балаһыанньатыттан биллиэҕэ. Билигин испэктээкиллэри онлайн-көрүҥүнэн ыытылларга этилиннэ. Эрдэ ылыллыбыт билиэттэри каассаҕа төнүннэриэххэ эбэтэр атын күҥҥэ атастаһыннарыахха сөп.
ххх
Былатыан Ойуунускай аатынан Саха тыйаатыра сааскы гостуруолларга барыан иннинэ, тохсунньуга-олунньуга саҥа туруорууларын көрөөччүлэригэр бэлэх уунуохтааҕа. Онон, хааччахтар бүттэхтэринэ, Саха тыйаатырыгар ханнык саҥа испэктээкиллэри көрүөхпүтүй?
Көрөөччүлэр дьүкээгир драматура Геннадий Дьячков «Саһарҕа хоптото» испэктээкили режиссер Карл Сергучев туруоруутун сэҥээриэхтэрэ. Бу испэктээкили аан бастаан 1983 сыллаахха Андрей Борисов туруорбута. 40-ча сылынан иккистээн эргиллибит испэктээкил тыҥаан турар тиэмэтэ уларыйбат. Ытык айылҕаны, төрүт сири көмүскээһин, олох иһин охсуһуу Ярхадаана уобараһынан көрдөрүллэр. Режиссер Карл Сергучев иһитиннэрбитинэн, сүрүн дьоруой өлүүтэ – киһи-аймах эстиитигэр бастакы хардыы. Ярхадаана оруолун СӨ үтүөлээх артыыската Домна Уйгурова оонньоон үтүө өйдөбүлү хаалларбыт буоллаҕына, билиҥҥи көрөөччүлэргэ артыыска Айталина Цыпандина Ярхадаана уобараһын арыйыаҕа. Оттон Домна Васильевна Ярхадаана эбээтин оонньуоҕа.
Артыыс уонна режиссураҕа холонор Василий Борисов И.Вилквист «Гельвер түүнэ» пьесатынан «Сүөһүлэр» диэн үлэтин былырыын сэтинньи 25 күнүгэр Москваҕа «Диалоги» тыйаатыр аан дойдутааҕы III бэстибээлигэр билиһиннэрбиттэрэ. 2019 сыллаахтан саҕаламмыт бэстибээлгэ икки эрэ артыыс оонньуур испэктээкиллэрэ кытталлар. Василий Борисов үлэтин Москва тыйаатырдарын кириитиктэрэ үрдүктүк сыаналаабыттара уонна дойду киин куоратыгар киэҥ эйгэҕэ көрдөрөргө ыҥырыллыбыта. Онон, саха көрөөччүлэрэ сотору кэминэн «Сүөһүлэр» испэктээкилгэ РФ уонна СӨ үтүөлээх артыыската Елена Сергеева-Румянцеваны уонна РФ үтүөлээх артыыһа, СӨ норуодунай артыыһа Петр Баснаевы дьикти оруолларга көрүөхпүт.
Ону таһынан тыйаатыр, суруйааччы Семен Яковлев-Эрилик Эристиин төрөөбүтэ 130 сыла бэлиэтэнэринэн сибээстээн, Саха тыйаатыра кини «Маарыкчаан ыччаттара» диэн аатырбыт айымньытын испэктээкилинэн көрдөрүөҕэ.
Надежда ЕГОРОВА, «Саха сирэ» хаһыат, edersaas. ru