Бүгүн, кулун тутар 5 күнүгэр, доҕорбут, биир идэлээхпит, СӨ култууратын үтүөлээх үлэһитэ, СӨ П.А. Ойуунускай аатынан судаарыстыбаннай бириэмийэтин, Казахстан норуоттар икки ардыларынааҕы «Алаш» литератураҕа бириэмийэтин лауреаттара, Таатта уонна Нам улуустарын бочуоттаах гражданина, СӨ Духуобунаска академиятын бочуоттаах академига, Арассыыйа Суруйааччыларын, Саха сирин Суруйааччыларын сойуустарын ытык сүбэтин чилиэнэ Николай Егорович Винокуров-Урсун бу орто дойдуттан араҕыста…
edersaas.ru
Николай Егорович Саха сирин Суруйааччыларын тэрилтэтин бигэ тулааһына этэ, уһуннук сойуус бэрэссэдээтэлин солбуйааччынан, Литератураны пропагандалыыр бюро дириэктэринэн, «Чолбон» сурунаал уонна Саха сиринээҕи кинигэ кыһатын бас эрэдээктэринэн үтүө суобастаахтык, көнө сүрүннээхтик үлэлээбитэ. Бэйиэт, прозаик, документалист-суруйааччы, тылбаасчыт, литература кириитигин уонна эрэдээктэрин быһыытынан бар дьон кутун тутар айымньылары, кинигэлэри суруйталаабыта. Казах уонна саха суруйааччыларын доҕордоһууларын ситимнээччинэн буолбута.
Кини быйыл муус устарга 77 сааһын туолуохтааҕа, өссө да айар-тутар былааннардааҕа.
Саха сирин Суруйааччыларын сойууһун бырабылыанньата