Бииргэ арыгылыы олорон, кыыһырсан дайбаһыы, кырбааһын эбэтэр ол-бу тэрилинэн киһини эчэтии куруук тахсар. Бу ааспыт өрөбүл күннэргэ оннук быһылааннар эмиэ тахсыбыттарын туһунан СӨ ИДьМ-тын пресс-сулууспата иһитиннэрэр. Ол курдук…
Өймөкөөҥҥө. 36 саастаах киһини 35 саастаах үөлээннээҕэ итирэн баран кыыһырсыы түмүгэр, көхсүгэ быһаҕынан анньыбыт.
Дьокуускайга. П.Алексеев аатынан уулуссаҕа турар түүҥҥү баарга суһал-силиэстийэлиир бөлөҕү сэргэ «суһал көмө» массыыната тиийбиттэр. Ол онтон өрөспүүбүлүкэтээҕи хирургияҕа Мэҥэ Хаҥаластан төрүттээх 24 саастаах уол киллэриллибит — төбөтүн уҥуоҕа алдьаммыт, мэйиитэ доргуйбут. Уорбаланааччыны туппуттар — Кэбээйиттэн төрүттээх 25 саастаах уол.
Ити күн киэһэтигэр балыыһаҕа бэйэтин кыбартыыратыттан аны 57 саастаах киһи киллэриллибит. Искэ быһаҕынан анньыллыбыт. Уорбаланааччы быһыытынан, бииргэ олорор 49 саастаах дьахтара тутуллубут.
Өлөөҥҥө. Субуота киэһэ улуустааҕы балыыһаҕа түөскэ быһаҕынан анньыллыбыт 34 саастаах киһи киллэриллибит — кинини үөлээннээҕэ эчэппит.
Бу чахчыларынан процессуальнай бэрэбиэркэлэр ыытыллаллар, ол түмүгэр, холуобунай дьыалалар тэриллиэхтэрэ. Бэлиэтээн эттэххэ, бу түбэлтэлэргэ буруйу оҥорууга уорбаланааччылар бары урут сууттана сылдьыбатах дьон.
Полиция сэрэтэр: Саҥа дьыл, ону тэҥэ, уһун бырааһынньыктааҕы сынньалаҥ күннэрэ чугаһаатылар. Саҥа үүммүт сылы полиция отделыгар дуу, балыыһаҕа дуу буолбакка, үөрэ-көтө, чугас дьоҥҥутун, доҕотторгутун кытта бэлиэтииргэ кыһаллыҥ.
Биһиги корр., «Саха сирэ» хаһыат, edersaas.ru
Хаартыска: интэриниэттэн.