Маны аах Эдэр саас

Японияҕа олорор сахалар ыһыахтыыллар

Вида Ефремова Хаҥалас улууһун Уулаах Аан нэһилиэгиттэн төрүттээх. 2011 сыллаахха кэргэнин уонна оҕотун кытары дьиэ кэргэнинэн Японияҕа көспүттэр.

Кини Японияҕа үлэлии-хамсыы үөрэнэ сылдьар ыччаты мунньан, сыл аайы Япония тэбэр сүрэҕэр Токио куоракка ыһыах ыытар.

Төрөөбүт дойдуларыттан тэлэһийэ сылдьан хайдах ыһыаҕы тэрийэллэрин билээри Вида Ефремованы кытары сибээстэстибит.

— Кэргэммин кытары иккиэн дьоппуон тылын учууталларабыт. Японияҕа көһөн кэлбиппит быйыл номнуо уон сыла буолар. Маҥнай Тояма диэн префектураҕа алта сыл олорбуппут, онно сахалар суохтар этэ.

Мин манна олорор сахалары кытары былырыыҥҥыттан үчүгэйдик билсэн барбытым. Социальнай ситимҥэ бөлөх тэринэн кэпсэтэбит. Үксэ үлэлиир ыччаттар, устудьуоннар аҕыйахтар. Токио куоракка олорор, үлэлиир ыччаты кытары бары холбоон уон биэспит. Олохсуйбуттара ырааппыт дьон бааллар эрээри, кинилэри кытары соччо билсибэппит.

Ыһыаҕы аан бастаан Токиоҕа көһөн кэлэн баран ыыппыппыт. Саха кыыһын кытары чугастыы олорбуппут, онон өрүү кэпсэтэр, билсиһэр этибит. 2018 сыллаахха кыратык ыһыах курдук көрсүөххэ диэн сүбэлэспиппит. Алаадьы астанан, барбекю ылан ыһыах күнүн бэлиэтээбиппит.

2019 сыллаахха хааччахтааһын диэн суох этэ, Токиоҕа олорор сахалар мустубуппут. Токио иһигэр элбэх саха биирдэ баар буола түспүтэ наһаа үчүгэй этэ. Онно көрсүһэн ирэ-хоро кэпсэтэн, түргэн үлүгэрдик ыһыах тэрийбиппит. Дьиэ  иһигэр ыһыахтаабыппыт.

Үһүс ыһыахпыт былырыын буолбута. Аан дойду үрдүнэн биллэриллибит пандемия хааччахтааһына буолан, элбэх киһи кэлбэтэҕэ эрээри, ыччат мустан ойуурга ыһыаҕы бэлиэтээбиппит. Барбекю, алаадьы астанан, сахалыы миин буһарыммыппыт. Сахалар мустан олус үөрбүппүт.

Дьиҥинэн ыһыаҕы тэрийэр улахан уопуппут суох. Онон алаадьы буһарынан, миин астанан, үтэһэлээх эт оннугар барбекюлаан бэлиэтиибит.Аны манна Токиоҕа элбэх буолан муста түстүҥ эрэ пааркаҕа олорунан аһаан киирэн барбаккын. Барыта эрдэттэн тэриллэн, остуол уурдаран былааннаах буолар ирдэнэр.

Япония хампаанньаларыгар араас хайысхаҕа үлэлии сылдьар ыччаттар көрсүөхтэрин, ыһыахтыахтарын олус баҕараллар. Быйыл ойуурга, айылҕаҕа бэлиэтиэх буолбуппут даҕаны, күүстээх ардах сезона мэһэйдээн, дьиэ иһигэр ыллыбыт.  Төрөөбүт дойдубутуттан тэлэһийэн сылдьан сахалыы тыллаах, саха тыыннаах дьон мустан төрөөбүт тылбытынан ирэ-хоро кэпсэтэрбит даҕаны биһиэхэ олус күндү.

 

Надежда Ильина, edersaas.ru

Хаартыскаҕа: Японияҕа буолбут ыһыахтар түгэннэриттэн

2
0