Киото префектуратын университетын учуонайдара коронавирус сыһыннаҕына, ультрафиолет уотугар сырдатан көрдөрөр маасканы айдылар. Бу мааска тас өттүн флуоресцентнай кыраасканан соппуттар. Кырааска састаабыгар страус сымыыттарыттан ылыллыбыт “антитела” бааллар эбит.
Бу “антитела” коронавируһу биллилэр да, уларыйаллар. Былырыын учуонайдар тыһы страустарга коронавирус чэпчэки көрүҥүн киллэрбиттэр, онон сымыыттарыгар элбэх “антитела” баара биллибит.
— Биһиги страус сымыыттарыттан “антителаны” маассабайдык, чэпчэки сыанаҕа элбэҕи оҥоруохпутун сөп. Онон хас биирдии киһи бу маннык чэпчэки уонна суһал тестэри туһаныан сөп, — диэн чинчийэр бөлөх салайааччыта Ясухиро Цукамото этэр.
Чинчийиигэ “ковидынан” ыалдьыбыт 35 киһи кыттыбыт. Кинилэр мааскалара ультрафиолет уотугар сырдыы умайар эбит. Вирус ноҕурууската кыччаабытыгар, сыыйа сырдыыра сүтэн барар. Оттон ыалдьыбатах дьон мааскалара сырдаабат. Учуонайдар аны 150 киһилээх бөлөххө чинчийиини ыытар былааннаахтар.
Ангелина Васильева, “Саха сирэ” хаһыат, edersaas.ru