2017 сыл тохсунньу 1 күнүттэн Арассыыйа уонна Япония икки ардыларыгар визаны оҥотторуу судургутуйда. Бу туһунан РФ Тас дойдулар дьыалаларыгар министиэристибэтигэр сигэнэн RТ сайт иһитиннэрдэ.
Санатар буоллахха, маннык быһаарыы ааспыт сыл ахсынньытыгар Владимир Путин уонна Синдзо Абэ үрдүк таһымҥа көрсүһүүлэрин кэмигэр араас хайысхаҕа икки өттүттэн барыстаах хардарыта сибээһи кэҥэтэр туһуттан ылыныллыбыта. Онон үүммүт сылтан икки дойду гражданнарыгар визаны оҥорууга судургутутуу миэрэлэрэ киллэрилиннилэр.
Мантан антах Арассыыйа олохтоохторугар кылгас кэмҥэ баран кэлиигэ анаан бэриллэр хас да төгүллээх быстах болдьохтоох виза дьайыыта биэс сылга диэри уһаан биэриэҕэ. Оттон 30 хонукка диэри сылдьыыны көҥүллүүр хас да төгүллээх быстах болдьохтоох визанан үс сыл туһаныахха сөп буолуо. Маны сэргэ Японияҕа бэйэ баран кэлиигэ онно көрсөөччүлэртэн булгуччулаах мэктиэлээһин аны ирдэниллибэт буолла.
Арассыыйа тас дойдутааҕы консульскай тэрилтэлэрэ Япония гражданнарыгар алта ый болдьохтоох хас да төгүллээх турист визатын, биир сыл болдьохтоох хас да төгүллээх чааһынай сырыы визатын, ону сэргэ биэс сыл болдьохтоох дьыалабыай, гуманитарнай сыаллаах хас да төгүллээх визаны оҥорон биэрэллэр.
Роман Попов, “Саха сирэ” хаһыат, edersaas.ru
Ааптар хаартыскаҕа түһэриитэ.