Ааспыт нэдиэлэҕэ Хотугулуу-Илиҥҥи федеральнай университекка Япония Хабаровскай куоракка саҥа анаммыт генеральнай куонсула Масанори Фукусима уонна вице-куонсул Манабу Мородомины кытта көрсүһүү буолан ааста.
Көрсүһүүгэ ХИФУ естественнэй уонна тиэхиньиичэскэй хайысхаларга проректора Анатолий Николаев, норуоттар икки ардыларынааҕы үлэлэһиигэ проректор Владлен Кугунуров итиэннэ университет бэрэпиэссэрдэрин-преподавателлэрин састааба кытынна.
“Господин Фукусима бииргэ үлэлэһиигэ санааларын биллэрдэ. Ол курдук, бастатан туран, устудьуоннар уопут атастаһыыларын элбэтиэн, бу икки дойду сибээһин бөҕөргөтүөн баҕарарын эттэ. Күн бүгүн биһиги университеппытыгар Япония үс устудьуона кэлэн үөрэнэ сылдьарын истэн соһуйда”, — диэн ХИФУ зарубежнай филологияҕа уонна регионоведениеҕа институтун сэбиэдиссэйэ Елена Руфова иһитиннэрдэ.
Анатолий Николаев Япония тэрилтэлэрин кытта бырайыагы, Хоккайдо университетын кытта климат уларыйыытын чинчийиигэ уонна ХИФУ естественнэй наукаҕа институтунуун магистратураҕа бииргэ үлэлэһии былаанын үллэһиннэ.
Владлен Кугунуров Siberian Summer school – Nature. People.Culturе диэн нуучча тылыгар норуоттар икки ардыларынааҕы лааҕыр туһунан кэпсээтэ. Ону тэҥэ, ХИФУ устудьуоннара Япония университеттарыгар тыл уонна наука өттүгэр үлэҕэ холонон көрөр быраактыкаҕа (стажировка) барар дуогабардарын билиһиннэрдэ.
Көрсүһүү түмүгүнэн, ыалдьыттар ХИФУ бырайыактара олоххо киириитигэр кыахтарын иһинэн көмөлөһүөх буоллулар. Кинилэр Япония бырабыыталыстыбата биллэрбит норуоттар икки ардыларынааҕы граннарын, онно устудьуоннар уонна преподавателлэр кыттыахтарын сөбүн кэпсээтилэр. Илиҥҥи тыллары уонна дойдулары үөрэтэр хаапыдыра устудьуоннара атастаһан үөрэнии бырагырааматын, Хабаровскайга барбакка эрэ докумуону туттарыыны сэҥээрдилэр.
Майя АКИМОВА, ХИФУ пресс-сулууспата.