Саха сирин таможенниктара оҥоһуллубатах-чочуллубатах янтарь тааһы кыраныысса таһыгар таһааран иһиини туттулар. Бу туһунан Благовещенскай таможнятын сүрүн судаарыстыбаннай иниспиэктэрэ Виталий Шабанов иһитиннэрдэ.
Ол курдук, Дьокуускай куорат аэропордун норуоттар икки ардыларынааҕы секторыгар Харбиҥҥа (КНР) көтөөччүлэри таможня хонтуруоллуур кэмигэр Кытай гражданиныттан декларацияҕа суруллубатах табаары булбуттар.
Бу омук киһитэ Евразийскай экономическай сойуус таһыгар 10,3 кг ыйааһыннаах янтарь тааһы таһааран испит. Кини быһаарбытынан, бу табаары Москва куорат биир ырыынагыттан атыыласпыт.
Саха сирин таможенниктара табаарга аахта толорбуттар уонна сороҕун таможеннай экспертизаҕа ыыппыттар.
Эксперт быһаарбытынан, бу сырдык бороҥ өҥнөөх айылҕа тааһа янтарь араас көрүҥэ эбит.
Омук гражданиныгар РФ Административнай кодексатын 16.2-с ыст. 1 чааһынан уонна 16.3-с ыстатыйатынан дьыала тэриллибит.
Биһиги корр., «Саха сирэ» хаһыат, edersaas.ru
Хаартыскалар: таможня пресс-сулууспатын түһэриитэ.