Соторутааҕыта Алексей Навальнай Twitter социальнай ситимҥэ Төрүт Сокуоҥҥа Арассыыйа олохтоохторо, биллэр-көстөр дьон эбии киллэриилэри биһирииллэрин туһунан санааларын эппиттэрин кинилэри «таҥнарыахсыттар», «холуйдар» диэн үөхтэ.
edersaas.ru
Үөҕүллүбүт дьон ортотугар Аҕа дойду Улуу сэриитин кыттыылааҕа, 17 сааһыттан бартыһааннабыт, Белоруссияны, Харьковы босхолооһуҥҥа, Днепр өрүһү туорааһыҥҥа кыттыбыт Игнат Артеменко баар. Аҕа дойдуну көмүскээһиҥҥэ, аармыйаҕа полковник олоҕун 39 сылын анаабыт.
Навальнай ытык киһини үөҕүүтүн Арассыыйа олохтоохторо олус өһүргэнэ иһиттилэр. Кэрэхсэбиллээҕэ баар, Саха сирин ыччата эмиэ сэрии бэтэрээнэ үөҕүллүбүтүн сэмэлии ылынна.
Ол курдук, Дьокуускай куораттааҕы В.Г. Белинскэй аатынан бибилэтиэкэ ааҕар салаатын сэбиэдиссэйэ Яна Слепцова бэйэтин санаатын бу курдук тиэртэ:
— Аҕа дойду Улуу сэриитин бэтэрээнигэр хайдах «Ийэ дойду таҥнарыахсыта» диэн тылы, өйдөбүлү туттуохха сөбүй?! Буолаары буолан, Улуу Кыайыы 75 сылын бэлиэтиир, ытык дьоммутугар сүгүрүйэр кэммитигэр? Аҥаардас ити тыллартан да, сэрии кыттыылааҕар туһаайбыт киһи тылын-өһүн, толкуйун ылыныан баҕарбат. Ама, да утары киирсиигэ турбут иһин, хайдах бас-баттах итинник тыллаһыахха сөбүн өйүм хоппот. Кэбис, дьон буоллахпыт. Маннык эйэлээх олоххо олорон эрэ, итинник сиэри-майгыны тутуспат сүрэ бэрт! Онон саҥарар тылбыт-өспүт ис хоһоонун толкуйдуур кэммит кэллэ.
Елена ПОТОЦКАЯ, «Саха сирэ» хаһыат, edersaas.ru