Муус устар 5 күнүгэр «Сахамедиа» медиакиинигэр “Саха сирин киэн туттуута-2019” норуот бириэмийэтин “Норуот дипломата” үрдүк ааты туттарыы үөрүүлээх түгэнэ буолла.
Күөн күрэскэ куоластааһын түмүгүнэн, норуоттар икки ардыларынааҕы бырайыактар ааптардара уонна салайааччылара Лариса Кулаковская кыайыылааҕынан таҕыста. А.Е.Кулаковскай аатынан норуоттар доҕордоһууларын дьиэтин генеральнай дириэктэрэ, «СӨ норуоттарын Ассамблеята» уопсастыбаннай хамсааһын сопредседателэ Яна Игнатьева 3423 куолаһы ылан, түмүктүүр финалга киирдэ диэн Норуоттар доҕордоһууларын дьиэтин пресс-сулууспатыттан суруйаллар.
— Тэрийээччилэргэ уонна куоластарын миэхэ биэрбит дьоҥҥо махтанабын. Күөн күрэскэ норуоттар икки ардыларынааҕы сыһыаҥҥа, сибээскэ, хардарыта өйөһөн үлэлээһиҥҥэ кылааттарын киллэрсибит, төрөөбүт дойдуларын, өрөспүүбүлүкэлэрин аатын-суолун биллэрэргэ-көрдөрөргө үлэлэспит дьоһун дьон кытыннылар, — диэтэ Яна Викторовна.
Кыайыылаахтары эҕэрдэлээһиҥҥэ СӨ Тас сибээскэ уонна норуоттар дьыалаларыгар миниистирэ Гаврил Кириллин кытынна. Кини: «Норуот дипломата» диэн анал ааты ылыы иһин күрэс бу аан бастакытын ыытылынна. Бу үтүө үгэс кэлэр да өттүгэр салҕанарыгар эрэнэбин. «Сахамедиа» ААУо, бары тэрийээччилэргэ махтанабын«, — диэн эттэ.
«Сахамедиа» генеральнай дириэктэрэ Алексей Чертков: — «Саха сирин киэн туттуута» бириэмийэни туттарыы иккис сылын тиһиктээхтик салҕанар. Биһиэхэ дьон-сэргэ билэр, ытыктыыр дьоно кытталларыттан, кыайалларыттан, номинант буолалларыттан үөрэбит. Түмүк наҕараадалааһын ахсынньыга — Арассыыйаҕа Дьоруойдар күннэригэр ыытылларыгар, «Сахамедиа» бриллианнаах үрүҥ көмүс бэлиэтэ туттарыллыа, — диэтэ.
Финалистарга Яна Игнатьева, Саргылаана Нафанаилова, Михаил Ершов уонна Николай Барамыгин киирдилэр.