Бэҕэһээ — Арассыыйа суруйааччыларын сойууһун чилиэнэ, поэт, биллэр суруналыыс Яна Байгожаева күн сирин көрбүт күнэ. Яна Байгожаева нарын эрээри күүстээх, чараас эрээри дириҥ ис хоһоонноох поэзията 90-c сыллар бүтүүлэригэр уонна 2000-c саҕаланыыта киэҥник биллэн барбыта. Үйэлэр кирбиилэригэр умайан күлүбүрүүр уот кутаа уобарастаах Яна айымньылаах үлэтин түмүгэр түөрт хоһоон хомуурунньугун таһааран, ааҕааччытыгар бэлэх ууммута.
Аан дойдутааҕы поэзия күнүгэр Былатыан Ойуунускай аатынан Саха академическай тыйаатырын “Поэттыын сэһэргэһии” бырайыагын иккис түһүмэҕэр Яна Байгожаева “Дьикти саас эн кэллиҥ, кэрэни эргиттиҥ” диэн айар киэһэтэ үрдүк таһымнаахтык ааспыта. Айар киэһэни ымпыгар-чымпыгар тиийэ толкуйдаан бырайыак ааптардарыттан биирдэстэрэ, Саха тыйаатырын сүрүн режиссера Руслан Тараховскай туруорда.
Бу киэһэ тыйаатыр лабораторияҕа саалатыгар толору мустубут поэт айар үлэтигэр сүгүрүйээччилэр көрөөччү быһыытынан кэлэн Саха тыйаатырын биллэр-көстөр хас да көлүөнэ артыыстар: Зоя Багынанова, Домна Уйгурова, Зоя Попова, Софья Баранова, Василий Борисов, Ирина Никифорова, Айаал Аммосов, Ильяна Павлова, Валентин Макаров, Татьяна Легантьева, Дмитрий Татаринов, Жанна Ксенофонтова, Ирина Михайлова, эдэр артыыска Айталина Цыпандина толорууларыгар Яна Байгожаева хоһооннорун алыптаах долгунугар уйдарбыппыт, долгуйбуппут, уйадыйбыппыт. Дойдуга таптал, ахтылҕан, туһунан хоһоонноро ордук долгутуулаахтык иһиллибиттэрэ, көрөөччү уйулҕатын таарыйыан таарыйбыттара. Поэзия киэһэтин скрипка уонна флейта тыыннаах доҕуһуолунан Андрей Дедюкин уонна Балдорж Хуухэ киэргэппиттэрэ хоһоон тыыннаах айымньы буоларыгар итэҕэттэ.
Поэзия киэһэтин биир соһуччу үөрүүлээх түгэнинэн Яна Байгожаева төрөөбүт дойдутун Өлтөх нэһилиэгин бочуоттаах олохтооҕун аатын иҥэрбиттэрэ буолар.
Түөрт кыталык кыыс ийэтэ аныгы олох түргэн тэтимигэр кэми аттаран үлэни, айар үлэни, дьиэ кэргэни дьүөрэлии тутар. Яна икки тылынаан холкутук суруйар суруналыыс, дьон дууһатын ыарыытын тулуйар уйулҕаһыт уонна киинэ продюсера. Даҕатан эттэххэ, “Пугало” киинэни сырдатыыга үлэлэспитэ уонна “Муммуттар” киинэҕэ продюсерынан үлэлээбитэ.
Надежда Ильина, edersaas.ru
Хаартыскалар — Яна Байгожаева архыыбыттан.