Италия биллиилээх ырыаһыта Робертино Лоретти 13 саастааҕар “Jamaica» диэн ырыаны ыллаан аан дойдуга биллибитэ. Оттон бу ырыаны манна, Саха сиригэр, сэттэтигэр эрэ барбыт уолчаан ыллаан, көрөөччүлэр сүрэхтэрин сүүйбүтэ.
Тыбыс-тымныы кыһыннаах, күдэрик туманнаах Сахабыт сиригэр, чап-чаҕылхай куоластаах быыкайкаан уолчаан «Ямайканы» ыллаан, аламааспыт курдук күлүмүрдүү, сүрэҕи-быары өрүкүтэ, соҕотохто сулус курдук чаҕылыйа түспүтэ. Маныаха дьоҕурдаах оҕолору булан салгыы сайыннарарга, кинилэргэ көмөлөһөргө уһуйар учууталларын, өйөбүл буолар төрөппүттэрин сэргэ, Татьяна Гоголева «Полярная звезда» диэн анаан тэрийбит куонкуруһа далаһа уурбута.Сценаҕа кырачаан Алеша Винокуров бу ырыаны ыллыырын үгүс киһи өйдүүр. Көрөөччүлэр кинини наһаа таптаабыттара уонна “Ямайка уол” диэн ааттаабыттара. Үөрэн-көтөн мичилийбитинэн тэлээрэн тахсарын кытта, саала иһэ уруйдаан ытыс тыаһа өрө хабылла түһэрэ. Чэпчэкитик туттан-хаптан, хамсанан-имсэнэн үҥкүүлүү-үҥкүүлүү ыллаан бардаҕына, көрөөччүлэр курбуулаан олорор чысхааннаах тымныыларыттан тэйэн, ханна эрэ сып-сылаас дойдуга улахан карнавалга сылдьар курдук буола түһэллэрэ, тэҥҥэ үҥкүүлэһэн бараллара. Онтон бэттэх 15 сыл ааста.
[vc_video link=»https://youtu.be/BkSN_gxbtRk»]-Бу ырыаны миэхэ оччолорго муусука кэллиэһин устудьуона, билигин композитор, ырыаһыт Семен Ченянов үөрэппитэ. Тылын-өһүн ийэм Оксана Гаврильевна тылбаас кинигэтиттэн көрөн барытын быһааран биэрэрэ. Лоретти ырыаларын истэрбит, кини туһунан ааҕарбыт, видеоларын көрөрбүт. Ырыаны наһаа сөбүлээбитим, онон тылын-өһүн түргэнник үөрэппитим. Ийэм глобуска Кариб муоратын, Ямайканы көрдөрө-көрдөрө онно кимнээх олороллорун, тугунан дьарыгыралларын, үүнээйитин, климатын, көтөрүн-сүүрэрин, киһи эрэ иһиттэр истэ олоруох курдук умсугутуулаахтык кэпсиирэ. Онон туох туһунан ыллыырбын өйдүүрүм. Бу сири-дойдуну көрүөхпүн наһаа баҕарарым. Ол ыра санаам быйыл туолла! Баран сынньанан, көрөн-истэн, астынан аҕай кэллим, — диир Алексей Винокуров.Дьон Ямайка уолбут ханна тиийдэ? Туох үлэһит буолан үүнэн-сайдан таҕыста? Билигин ыллыырын көрүөхпүтүн, истиэхпитин баҕарабыт дииллэр. Итинтэн да атын элбэх ыйытыыны биэрэллэр.
Көрөөччүлэр таптаан ааттыыр Ямайка уоллара, Тааттаттан тардыылаах Алексей Винокуров үөрэнэ да, үлэлии да сылдьан куонкурустарга, тэрээһиннэргэ куруук көхтөөхтүк кыттар.
Кини 2015 с. ХИФУ математика уонна информатика институтун бүтэрбитэ. Билигин it-компанияҕа программистыыр. ХИФУ юридическай уонна экономическай факультеттарын эһиил бүтэрэр.[vc_video link=»https://youtu.be/VwWGLjb5Jks»]Ырыа хонуутугар хардыылара
*Быыкайкаан Алеша Винокуровы биэс саастааҕар СӨ Бэрэсидьиэнин хоругар талан ылаллар.
*”Тулуйхан” устуудьуйаҕа СӨ култууратын үтүөлээх үлэһитэ Светлана Неустроеваҕа уонна СӨ искусствотын үтүөлээх диэйэтэлэ Егор Неустроевка дьарыктанар.
*Оччолорго ”Тулуйхан” устуудьуйаҕа үлэлиир муусука кэллиэһин устудьуона, билигин композитор, ырыаһыт Семен Ченянов Алешаҕа «Ямайка» ырыаны үөрэтэр. Түгэнинэн туһанан эттэххэ, Семен Ченянов бу ырыаны эмиэ оскуолаҕа үөрэнэ сылдьан ыллаан, дьону-сэргэни улаханнык үөрдүбүтэ, сөхтөрбүтэ.
СӨ үтүөлээх артыыстара Екатерина, Алексей Егоровтарга уһуйуллар.
Ситиһиилэриттэн билиһиннэрдэххэ
2004 с. «Хотугу сулус» өрөспүүбүлүкэ таһымнаах куонкуруска «Сыл бастыҥ саҕалааччыта» анал аат кыайыылааҕа.
«Саҥа үйэ талааннара-2004» аһаҕас II бэстибээл -куонкуруска эстраднай ырыа I степеннээх лауреата.
«Веселая радуга» (Украина) норуоттар икки ардыларынааҕы куонкурустарын I степеннээх лауреата.
Оҕолорго өрөспүүбүлүкэтээҕи «Полярная звезда – 2005» ырыа куонкуруһун Гран-при хаһаайына.
«Мир красоты и таланта – 2005» оҕолорго ыытыллыбыт бэстибээлгэ Саха сирин мини-мистера ааты ылбыта.
«Lire en cristal — 2005» норуоттар икки ардыларынааҕы бэстибээл лауреата. «Microphone en cristal» хаһаайына. (Франция, Париж).
«Merveille Russe in Tunisie» (Тунис) 2005 с. норуоттар икки ардыларынааҕы куонкурус кыайыылаа5а.
«Таланты нового века — 2005» III-с аһаҕас бэстибээл-куонкуруска эстрадный ырыа III степеннээх лауреата.
Pearl of the East. (Китай, Пекин, 2006 с.) норуоттар икки ардыларынааҕы куонкурус кыайыылааҕа.
«Саҥа ырыа — 2010» VI-интерактивнай телевизионнай куонкурус кыайыылааҕа.
«Этигэн Хомус — 2010» өрөспүүбүлүкэтээҕи бэстибээл «Открытие года» номинациятын кыайыылааҕа.
«Студенческая весна-2012» (Челябинскай) Бүтүн Арассыыйатааҕы куонкурус лауреата.
РФ бэрэсидьиэнэ В.Путин «В поддержку талантливой молодежи» бириэмийэтин лауреата.
«Туой Хайа-2012» өрөспүүбүлүкэтээҕи куонкурус лауреата.
«Этигэн Хомус -2014» — “Хит года” кыайыылааҕа.
“Үрдэл-2014 “ куонкурус кыайыылааҕа.
2015 с. «Этигэн хомуска” – “Интернет хит” номинация кыайыылааҕа.
Сардаана БАСНАЕВА, “Саха сирэ” хаһыат, edersaas.ru
Хаартыскалар уонна видеолар: «Саха» НКИХ уонна дьоруой тус архыыбыттан.