2018 с. ыам ыйын 1 күнүттэн Арассыыйаҕа курортнай төлөбүрү олоххо киллэрдилэр. Бастакынан бу саҥа хардыыны Ставропольскай уонна Алтайскай кыраай өйөөтүлэр.
Онон, сахалар сөбүлээн сылдьар Белокуриха куораппытыгар, хайалаах Алтайга күҥҥэ 30 солк. төлөтүөхтэрэ. Саамай үрдүк төлөбүр Кавказ минеральнай уулаах курортарыгар, Пятигорскайга, Ессентукига, Кисловодскайга о.д.а. олохтонно, күҥҥэ биир киһиттэн 50 солк. тутуохтара.
edersaas.ru
Кубань курортарыгар курортнай төлөбүрү футболга аан дойду чемпионата бүппүтүн кэнниттэн, 2018 с. от ыйын 16 күнүттэн хомуйуохтара. Оттон Крымҥа сынньана кэлбит дьонтон харчы ылары 2019 с. ыам ыйын 1 күнүгэр диэри тохтоттулар.
Эһиилгэттэн Алуштаҕа, Ялтаҕа, Судакка, Евпаторияҕа, Сакига, уопсайынан Хара муора кытылыгар күҥҥэ сыламныы, доруобуйатын бөҕөргөтүнэ кэлбит дьон күҥҥэ 10 –нуу солкуобай ууран биэриэхтэрэ.
Курортнай төлөбүрү сокуоннай саастарын туолбут эрэ дьонтон хомуйуохтара. Онон, 18 саастарын туола илик оҕолорун илдьэ барбыт төрөппүттэр бэйэлэригэр эрэ төлүөхтэрэ. Бу киирбит харчыны дойду иһигэр сынньалаҥ инфраструктуратын сайыннарарга, саҥа пааркалары тутарга, эргэлэри өрөмүөннүүргэ туттуохтара. Муниципальнай бүддьүөккэ сезоҥҥа 10-20 мөлүйүөн киирдэҕинэ, курорт сайдыытыгар – төһүү күүс буолуоҕа.
Билиҥҥи туругунан, Арассыйаттан омук сиригэр сынньана барыы дойду иһинээҕи туризмтан быдан үрдүк. Геополитика өттүнэн ислам итэҕэллээх дойду төһө да кутталлааҕын иһин, 2017 с. Турция кыраныыссата аһыллаатын кытта онно 5 мөл. Арассыыйа олохтоохторо сынньанан кэлбиттэрэ. Орто сыанаҕа күҥҥэ 4 дэлэгэйдик аһатар, курдары көҕөрүмтүйэн көстөр ыраас уулаах, сылаас муоралаах, аквапаркаҕа, бассейҥҥа сөтүөлэтэр, хамамҥа сылааҕын таһаарар Турция курдук үтүө дойду өтөрүнэн суох диэн туризм эйгэтин үлэһиттэрэ этэллэр. Сочи, Крым, Алтай санаторийдара, сынньалаҥ дьиэлэрэ онно тиийэллэрэ өссө да ыраах. Ол иһин курортнай нолуок киллэрэн, таһымнарын үрдэтэр, дьон сынньалаҥын тэрийиини быдан тупсарар санаалаахтар.
Марианна Тыртыкова, «Саха сирэ», edersaas.ru