Бүгүн, ыам ыйын 10 күнүгэр, коронавирус тарҕаныытын бохсор СӨ суһал ыстаабын мунньаҕа буолла. Тэрээһин кэнниттэн өрөспүүбүлүкэҕэ үөрэх хаамыытын салгыы олоххо киллэрии куттала суох усулуобуйатын олохтуур эбии миэрэлэри ылыыны быһаардылар.
Оҕолор ортолоругар COVID-19 ыарыы үрдээбитинэн сибээстээн, СӨ Үөрэҕин уонна наукатын министиэристибэтэ бирикээс таһаарда итиэннэ “Дьокуускай куорат” куораттааҕы уокуругун, Амма, Бүлүү, Мэҥэ Хаҥалас, Таатта, Уус Алдан, Чурапчы улуустарын баһылыктарыгар сүбэлиир (рекомендательные) суруктары ыытта диэн туһааннаах министиэристибэ саайтыгар суруллар.
Докумуоҥҥа олоҕуран, бу улуустарга ыам ыйын 11 күнүттэн 2020-2021 үөрэх дьыла түмүктэниэр диэри алын кылаастары, орто, улахан кылаас оҕолорун үөрэҕин уонна эбии үөрэхтээһин дьарыктарын үөрэх дистанционнай технологиятын туһанан ыытарга диэн этиллэр.
Атын улуустар баһылыктара ыраахтан олорон үөрэххэ (дистанционно) көһөрүүгэ быһаарыыны миэстэтигэр эпидемиологическай балаһыанньаттан көрөн, Роспотребнадзор уорганын кытта сүбэлэһэн ылалларыгар ыйыллар.
Ону тэҥэ, улуус уонна куорат бары баһылыктарыгар сүбэлииллэр:
— Хонтуруолунай үлэлэри, судаарыстыбаннай түмүктүүр аттестация тэрээһинин хаамыытын, 9-с уонна 11-с кылаастары бүтэрээччилэр судаарыстыбаннай түмүктүүр аттестацияларын Роспотребнадзор сүбэтин тутуһан олоҕурбут көрүҥүнэн (очно) ыытары хааччыйарга;
— 9-с уонна 11-с кылаас үөрэнээччилэригэр констультациялары уонна судаарыстыбаннай түмүктүүр аттестацияны бэлэмнэниини Роспотребнадзор сүбэтин тутуһан, аҕыйах бөлөхтөөх олоҕурбут көрүҥүнэн (очно) ыытарга.
Уһуйааннар коронавирустан харыстанар миэрэлэри тутуһан, салгыы олоҕурбут көрүҥүнэн (очно) үлэлииллэр.
Сиһилии ыйыллыбыт сигэнэн https://minobrnauki.sakha.gov.ru/news/front/view/id/3272141 киирэн ааҕыҥ.
edersaas.ru