Ил Дархан Айсен Николаев 2018 сыл сэтинньи 6 күнүгэр Саха Өрөспүүбүлүкэтигэр ыам ыйын 22 күнүгэр Сайылык күнүн бэлиэтиир туһунан ыйааҕы таһаарбыта.
edersaas.ru
Хороҕор муостааҕы, сыспай сиэллээҕи иитэн олорор өбүгэлэрбит уһун, тымныы кыһын кэнниттэн баччаларга, от-мас тыллыыта, сүөһүлэрин-астарын илдьэ кыстыктарыттан сайылыкка көһөн тахсар үгэстээхтэрэ.
Ыам ыйын 22 күнүн кинилэр дьыл бүтэн, саҥа сыл саҕаланар кэминэн ааҕаллара. Нууччалар кэлэн, Христос итэҕэлин киллэриэхтэриттэн, саха Саҥа сыла Ньукуола Таҥара күнүн кытта алтыспыта. Бу күн ыал барыта сайылыктарыгар тахсаннар, алаадьы буһараллара, сааһыт аҕалаах ыаллар кус сииллэрэ, сири-дойдуну аһаталлара, оҕо-уруу этэҥҥэ сылдьарын, сүөһү-ас этэҥҥэ турарын, уйгуну-быйаҥы биэрэрин туһугар Үрдүкү Айыылартан көрдөһөллөрө.
Быйылгыттан ыам ыйын 22 күнэ Ил Дархан норуот үгэһин сөргүтэргэ, эти-үүтү оҥорор үлэ дьонун өрө тутарга туһуламмыт ыйааҕынан, Сайылык күнүн быһыытынан бэлиэтэнэр. Онон бу күнү көрсө хас улуус, нэһилиэк ахсын сайылыкка анаммыт култуурунай-маассабай дьаһаллар, субуотунньуктар ыытыллаллар.
Өрөспүүбүлүкэ таһымнаах дьаһаллар үс сиринэн былааннаналлар: Хаҥалас улууһун Улахан Ааныгар Тыа хаһаайыстыбатын министиэристибэтин итиэннэ “Туймаада” ҮАПК тэриийиилэринэн, племенной хаһаайыстыбалар сүбэ мунньахтара буолуо итиэннэ Сайылык ыһыаҕа ыһыллыа. Иккиһинэн, “Сахамедиа” холдинг өрөспүүбүлүкэтээҕи медиакиинигэр Тыа хаһаайыстыбатын министиэристибэтин итиэннэ “Саха сирин отонноро” ХЭУо тэрийиилэринэн, олохтоох ас-үөл бастакы интэриниэт-маҕаһыынын SAYUN.RU (Сайын.ру) биһирэмэ былааннанар. Үсүһүнэн, Хатаска, Ой Бэскэ «Алаас Хотуна» уопсастыбаннай түмсүү тэрийиитинэн, Сайылыкка тахсыы сиэрин-туомун сырдатар Сайылык күнэ ыытыллыаҕа диэн Тыа хаһаайыстыбатын министиэристибэтин пресс-сулууспата иһитиннэрэр.
Раиса Сибирякова, «Саха сирэ» хаһыат, edersaas.ru