Ыам ыйын 25 күнүгэр Саха сирин дьоно мас олордуохтара

Бөлөххө киир:

“Маһы олордуу Бүтүн Россиятааҕы күнэ” – сыл аайы ыытыллар уопсастыбаннай-экологическай аахсыйа. Онно анаммыт Бүтүн Россиятааҕы аахсыйа Саха сиригэр ыам ыйын 25 күнүгэр ыытыллыа. 

edersaas.ru

Бу хамсааһын үүнэр ыччаты айылҕаҕа харыстабыллаах сыһыаҥҥа иитэр, дьон-сэргэ  болҕомтотун ойуур баайбытын харыстааһын, чөлүгэр түһэрии уонна тэнитии кыһалҕаларыгар тардар, ойуур хаһаайыстыбатын киэҥ эйгэҕэ биллэрэр соруктаах. Аахсыйа араас идэлээх, атын-атын эйгэлээх эрээри, саҥа ойууру үөскэтэр үтүө санаалаахтары барыларын биир сыалга-сорукка түмэринэн күүстээх.

Маһы олордуу Бүтүн Россиятааҕы күнэ 2011 сыллаахтан ыла дойду үрдүнэн кулун тутартан бэс ыйыгар диэри кэми хабан ыытыллар. Сылтан сыл кэҥээн, тэнийэн иһэрин аахсыйаҕа кыттааччы уонна олордуллубут мас ахсаана эбиллэрэ көрдөрөр: ол курдук, 2011 сыллаахха 150 тыһыынча киһи 24,5 мөлүйүөн маһы олордубут буоллаҕына, эһиилигэр икки төгүл элбэх киһи кыттыбыта.

Былырыыҥҥы аахсыйаҕа 4,1 мөлүйүөн киһи тахсан, 15 тыһ. гектардаах сиргэ 50 мөлүйүөнтэн тахса мас үнүгэһин олордубута. Аахсыйа саҕаланыаҕыттан ыла 12,5 мөлүйүөн кэриҥэ киһи араас көрүҥнээх 212 мөлүйүөнтэн тахса маһы олордууга кытынна.

Быйыл бу тэрээһин официальнай даататынан ыам ыйын 19 күнэ ааҕыллар. Ол гынан баран, халлаан сөрүүн буолан от-мас хойутаан тыллан эрэринэн, Саха сиригэр ыам ыйын 25 күнүгэр көһөрүлүннэ. Ону тэҥэ, аахсыйа чэрчитинэн үөрэх тэрилтэлэригэр ойуур тиэмэтигэр куонкурустар, викториналар уонна уоттан сэрэтэр дьарыктар ыытыллыахтара.

Саха Өрөспүүбүлүкэтин Ойуур сыһыаннаһыыларыгар департамена баҕалаах дьону барыларын маһы олордуу дьаһалыгар көхтөөхтүк кыттаргытыгар ыҥырарын иһитиннэрэр.

Василий НИКИФОРОВ, edersaas.ru

+1
0
+1
0
+1
0
+1
0
+1
0
+1
0
+1
0