Бэҕэһээ Бүлүү улууһугар Экология сыла биллэрилиннэ. Ыам ыйын 25 күнүгэр Бүлүү эбэ күнүн бэлиэтиир туһунан быһаарыы ылылынна.
Александр ТАРАСОВ, «Саха сирэ» хаһыат, https://edersaas.ru
Экологтар форумнарыгар Сунтаартан, Ньурбаттан, Үөһээ Бүлүүттэн, Дьокуускайтан уонна Өлүөхүмэттэн 100-тэн тахса киһи кытынна. Тэрээһиҥҥэ гражданскай уопсастыба институттарын сайыннарыы миниистирин бастакы солбуйааччы Савва Михайлов, айылҕа харыстабылын миниистирин солбуйааччы Николай Додохов кытыннылар.
“Форум биир уратыта диэн норуот, чуолаан уопсастыбанньыктар бэйэлэрэ көҕүлээн ыыттылар. Бүлүү уопсастыбаннай экологическэй кэмитиэт салайааччылара Владимир Тимофеев уонна Никита Архипов бэркэ тэрийдилэр.
Түөрт боппуруос тула кэпсэтии барда. Ол курдук, Бүлүү өрүһүн күнүн ыам ыйын 25 күнүгэр олохтуурга диэн этиини ылынныбыт. Бүлүү федеральнай суолунан айаннааччыларга экологическай култуураны тупсарыы, ыраастаныы тула санаабытын үллэһиннибит. Ураты харыстанар сирдэри Бүлүү улуустарыгар элбэтии тула дьүүллэһии буолла. Ил Дархан мөлүйүөн гектарга диэри ураты харыстанар сирдэри таһаарыаҕыҥ диэн этиитин тула кэпсэттибит.
Сыл аайы усунуос быһыытынан экологическэй кэмитиэти Бүлүү улуустарын дьаһалталарыттан үбүлүүргэ быһаардыбыт. Ону таһынан, биирдиилээн уопсастыбанньыктар, нэһилиэк баһылыктара бэйэлэрин санааларын аһаҕастык этиннилэр”, – диэн Савва Михайлов кэпсээтэ.
Форум түмүгүнэн ыҥырыы оҥоһулунна. Тэрийээччилэр резолюцияны эрэдээксийэлээн, былаас уонна уопсастыбаннас дьүүлүгэр таһаарыахтара. Экология сылыгар анаан элбэх бырайыак олоххо киириэ. Уопсастыбанньыктар Уопсастыба министиэристибэтин граныгар кыттыахтаахтарын кэпсээтилэр. Былырыын Бүлүү экологическэй кэмитиэт грант ылан турар. Тэрээһин түмүгэр чаҕылхай уопсастыбанньыктары, экологтары наҕараадалаатылар
Алмаас дивиденин экологическай сыалга туһаналларын модьуйдубут
Никита Архипов, “Бүлүү” экологическэй уопсастыбаннай кэмитиэт толорооччу дириэктэрэ:
—Бүлүү улууһугар 2017 сыл Экология сылынан биллэриллибитэ олус сөптөөх. Бүлүү өрүс экологиятыгар сыһыаннаах түөрт боппуруоһу мунньахха көрдүбүт. Бүлүү өрүс күнүнэн ыам ыйын 25 күнүн таллыбыт. Балаһанньатын бигэргэттибит. Сорохтор Ньукуолуну тала сатаатылар эрээри, ити күн табыллыбат. Ол курдук, Ньукуолуну тыытыа суохтаахпыт, туспа күн буолар. Итини тэҥэ, кустуу тахсыбыт эр дьон бука бары ити кэмҥэ киирэллэр. Аны туран, оскуола үөрэнээччилэрэ эмиэ баар кэмнэрэ. Онон ити күн түөрт улуус дьоно, ким баҕалаах, Бүлүү өрүс кытылын ыраастыахтаах.
Биир сүрүн боппуруоһунан, “АЛРОСА” хампаанньа алмаастаах улуустарга биэрэр дивиденин тула киэҥ далааһыннаах кэпсэтии ыытылынна. Ити дивидент бэриллэригэр Бүлүү экологическэй кэмитиэт оруолун бэлиэтээн туран, сорох улуустар итиннэ улаханнык кыһаллыбаттарын малтаччы эттим. Холобур, Анаабыр, Ленскэй, Өлөөн улуустара. Сунтаар улууһа барыларыгар холобур буолар. Ол курдук, былырыын алмаас дивиденин харчытынан 72 мөл. солк ыраах сытар 12 нэһилиэгэр ууну ыраастыыр эбийиэктэри туппута. Дивидент ылар атын улуустар эмиэ харчыны экология кыһалҕатын быһаарыыга быһаччы ыытыахтаахтарын ыйдыбыт. Резолюцияҕа ол туһунан киллэрдибит. Онон мантан инньэ дивидент харчытыттан экология боппуруостарын быһаарыыга туһаныахтара диэн эрэнэбит.
Александр ТАРАСОВ, «Саха сирэ» хаһыат, https://edersaas.ru