Өлүөнэ өрүс мууһа Ленскэй улууһун сиринэн устар. Көмүөл үөһээ кырыыта Ленскэй куораттан 90 км сиргэ баар. Уу таһыма 395 см. Муус 60 км сиринэн тайаан устар.
ЫБММ Саха сиринээҕи управлениетын пресс-сулууспата иһитиннэрбитинэн, суукка устата көмүөл 54 км уһунна. Гидрометеосулууспа Саха сиринээҕи управлениетын билгэлээһининэн, Ленскэй — Ньүүйэ учаастагынан өрүс ыам ыйын 11-13 күннэригэр эстэрэ сабаҕаланар.
Ньүүйэ өрүс мууһун алын кырыыта Ленскэй улууһун Орто Наахаратыттан 50 км үөһээ, оттон үөһээ кырыыта 150 км аллараа диэки баар.
Өлүөхүмэ өрүс уутун таһыма Дьиикимдэ — Куду Күөл хайысхатынан халбаҥныы турар. Бу учаастагынан муус ыам 10-13 күннэригэр хамсыыра сабаҕаланар.
Алдан өрүс былаһын тухары уу таһыма үрдүүр, суукка устата 5 — 30 см үрдээтэ. Томмот гидропоһун таһынан өрүс ыам ыйын 11-12 күннэригэр устара күүтүллэр.
Амма өрүс уутун таһыма суукка иһигэр 0,2-тэн 0,7 м диэри улаатта. Чугастааҕы биир-икки сууккаҕа Бууйаҕа — Амма учаастагар муус хамсыыра сабаҕаланар.
Сунтаар, Ньурба улуустарыгар Бүлүү өрүс уутун таһыма халбаҥныы турар. Сунтаар – Бүлүү хайысхатынан өрүс мууһа ыам ыйын 11-16 күннэригэр устара күүтүллэр.
edersaas.ru
Хаартыска https://14.mchs.gov.ru/deyatelnost/press-centr/novosti/4743153