Ыам ыйын 1 күнүттэн кэккэ чэпчэтиилэр, биэнсийэ, ПДД, COVID-19 утары охсуһуу туһунан сокуоннар олоххо киириэхтэрэ. Ханныктарый?
Лүөччүктэр уонна шахтердар биэнсийэлэрэ үрдүөҕэ
Хас биирдии биэнсийэлээххэ ыстааһыттан уонна ыйдааҕы дохуотуттан көрөн тус туһунан суума эбиллиэ. Эбии харчы сылга түөртэ олунньу, ыам ыйын, атырдьах ыйын, сэтинньи бастакы чыыһылатыгар уларыйыан сөп.
Уопсастыбаннай тырааныспартан оҕону холдьоҕор бобуллар
Кондуктордар, билиэти хонтуруоллааччылар, уопсастыбаннай тырааныспар суоппардара 16 сааһын туола илик төрөппүтэ суох сылдьар оҕону үүрэн таһаараллара бобуллар. Ыстараап суумата суоппарга — 5000 солк, кондуктарга уонна хонтуруоллааччыга — 20-30 тыһ солк буолуоҕа.
Суол быраабылатыгар уларыйыы
Тимир суолга суол быраабылатын кэһии ыстарааба 1000 солкуобайтан -5000 солк диэри улаатыа.
Көстөр сиргэ поезд чугаһаан иһэр буоллаҕына салайыллыбат тимир суолунан айанныыр бобуллар. Бэрээдэги кэһээччи административнай эппиэтинэскэ тардыллар уонна 5000 солк ыстараап төлүүр, 3-6 ыйга диэри айанныыр бырааба быһыллар. Быраабы кэһии хатыланар түгэнигэр болдьох биир сылга диэри уһуур.
Быраабы харыстыыр уорганнар оҕолоругар чэпчэтиилэр
20 сыл үлэлээбит ИДьМ уонна «Росгвардия» үлэһиттэрин оҕолоругар биэдэмистибэ салааларын үрдүк үөрэхтэрин кыһаларыгар киириигэ чэпчэтии оҥоһуллуо.
Дольщиктар интэриэстэригэр
Судаарыстыба эбэтэр бэйэни салайыныы бас билиитигэр сылдьар сир учаастактарын атыыта суох арендаҕа биэрии испииһэгэ кэҥиэҕэ. Холобур, тутааччы монкуруут баран, сиргэ наадыйар түгэнигэр туһалыаҕа. Өскөтүн монкуруут- тутааччы дольщик иннигэр эбээһинэһин толорор сыаллаах эбэтэр кредитор иннигэр иэһин төлүүргэ арбитражнай суут быһаарыыта баар буоллаҕына, тутааччыга сир учаастага арендаҕа бэриллэрэ көҥүллэниэҕэ.
Уһук Илин уокуругун инбэлиит оҕолоро босхо көтүөхтэрэ
Уһук Илин уокурук олохтоох инбэлиит оҕолоро эмтэнэр сирдэригэр босхо көтүөхтэрэ. Маннык чэпчэтиинэн арыаллааччы эмиэ туһаныа.
Тас дойдуттан кэлиигэ COVID-19 икки тиэһин туттарар булгуччулаах
Ыам ыйын 1 күнүн кэнниттэн тас дойдулартан кэлбит Арассыыйа олохтоохторо ПЦР ньыматынан хос тест туттараллара булгуччулаах. Бастакы тест айаннаан кэлэн баран 5 күн иһигэр туттарыллар. Хос тест бастакы тиэс кэнниттэн сууккаттан итэһэҕэ суох кэминэн туттарыахтара.
Налоговай вычеты ылыы бэрээдэгэ судургутуйуо
Ыам ыйын 21 күнүттэн Арассыыйаҕа НДФЛ нолуогуттан баай-дуол уонна инвестиция вычетын төнүннэрии бэрээдэгэ уларыйыа. Урукку курдук декларация толоруутун сырсыбакка, Федеральнай нолуок сулууспатын саайтыгар тус кэбиниэккэ ирдэнэр докумуоннары киллэриинэн судургутуйуо. Уларыйыылар дьиэ-уот атыылаһыы, кирэдьиит бырыһыанын төлөбүрүн уонна инвестиция уурунуутун вычеттарыгар киириэҕэ.