Бэҕэһээ, муус устар 23 күнүгэр, РФ Бэрэсидьиэнэ Владимир Путин маай бырааһынньыктарын күннэригэр өрүүр туһунан ыйаахха илии баттаата.
Ол курдук, ыам ыйын 1-10 күннэригэр дойду үрдүнэн сынньалаҥы биллэрэр туһунан тустаах докумуон Кириэмил саайтыгар таҕыста диэн ТАСС иһитиннэрэр. Ыйаахха “2021 сыл ыам ыйын 4-7 күннэригэр үлэһиттэр хамнастарын оннунан хаалларан туран өрөбүл күннэринэн ааҕарга” диэн суруллубут. Докумуоҥҥа “Коронавирус дьаҥа тарҕаныытын аҕыйатар уонна РФ гражданнарын доруобуйаларын бөҕөргөтөр сыаллаах” маннык миэрэ ылыллыбытын туһунан бэлиэтэнэр. Санатан эттэххэ, Маай, Үлэ бырааһынньыгынан быйыл ыам ыйын 1-3 күннэригэр, Кыайыы күнүгэр ыам ыйын 8-10 күннэригэр өрүөхтээх этибит.
Роспотребнадзор салайааччыта Анна Попова вице-премьер Ольга Голикованы уонна доруобуйа харыстабылын бэрэстэбиитэллэрин — учуонайдары, быраастары кытары көрсөн сүбэлэһэн баран, дойду Бэрэсидьиэнигэр Маай бырааһынньыктарын күннэрин икки ардыгар турар үлэ күннэрин өрөбүл күннэринэн биллэрэр туһунан этии киллэрбитэ. Кини этэринэн, маннык быһаарыныыны ылыныы, ыарыы тарҕаныыта аҕыйыырыгар төһүү буолар. Владимир Путин Роспотребнадзор салайааччытын этиитин өйөөтө уонна дьаҥы утары охсуһар вирусологтар, исписэлиистэр санааларын өрүү болҕойон истэрин туһунан бэлиэтээтэ.