Бүгүҥҥү туругунан, өрөспүүбүлүкэҕэ 97 киһи коронавируһунан ыалдьыбыта билиннэ. Ольга Балабкина брифинг кэмигэр иһитиннэрбитинэн, сүрүннээн ыалынан, аймаҕынан уонна үлэ кэлэктииптэригэр сыстыһан, ыалдьаллар.
Саха сиригэр элбэх оҕолоох дьиэ кэргэттэр элбэхтэр, ону тэҥэ, улахан аймах-уруу дьоно ыкса билсэн-көрсөн олороллор. Ол эрээри, ыалынан, аймаҕынан ыалдьыы түбэлтэлэрэ тахса тураллар. Ол дьиэ кэргэн бырааһынньыктарыгар мустуу содула буолуон сөп.
Билигин аҕам саастаахтар декадалара буола турар. Хомойуох иһин, бэл, сэрии бэтэрээннэрэ ковидынан ыалдьан, балыыһаҕа киирбит түбэлтэлэрэ баар. Үтүөрэн тахсыбыттар бааллар эрээри, Ольга Балабкина аҕам саастаах аймахтары, кырдьаҕастары ураты харыстыырга ыҥырда.
Ону тэҥэ, улахан да, кыра да тэрилтэлэргэ сыстыһыы тахса турар. Атырдьах ыйыгар бырабыыталыстыба уонна идэлээх сойуустар мунньахтарыгар үлэни биэрээччилэр эппиэтинэстэрин үрдэтэр, тэрилтэлэргэ санитарнай ирдэбиллэри тутуһар туһунан кэпсэтэн тураллар. Оскуола дириэктэрдэрэ, үөрэх управлениеларын салайааччылара эппиэтинэһи сүгүөхтээхтэр.
Ольга Балабкина “АЛРОСА” хампаанньа эрдэттэн дьаһанан, суһал миэрэлэри ылынан, ыарыыны тарҕаппатаҕын, тохтоппутун, ол үгүс тэрилтэлэргэ холобур буоларын туһунан тоһоҕолоон бэлиэтээтэ.
Ангелина Васильева, «Саха сирэ» хаһыат, edersaas.ru