Тохсунньу 26 күнүнээҕи туругунан, өрөспүүбүлүкэ үрдүнэн 128 киһи коронавируснай инфекциянан ыалдьыбыта бигэргэннэ. Ол иһигэр Дьокуускайга – 45 киһи. Ол туһунан өрөспүүбүлүкэтээҕи суһал ыстаап салайааччытын солбуйааччы Ольга Балабкина иһитиннэрдэ.
Билиҥҥи туругунан, Мииринэй (34 киһи), Нерюнгри (15), Алдан (14) оройуоннарыгар ордук элбэх киһи ыалдьар. Ол куораттарга элбэх киһи олорорунан быһаарыллар, ону тэҥэ, бэйэни хааччахтаныы эрэсиимин кэһии эмиэ төрүөттээх. Өссө 8 улууска бииртэн-түөртүүгэ тиийэ киһи ыарыйда. Бу кэнники 3 ый иһигэр улуустарга саамай намыһах көрдөрүү диэн Ольга Балабкина бэлиэтээтэ.
Ил Дархан ыйааҕынан, билигин да оннук эрэсиим ирдэбиллэрэ тутуһуллуохтаахтар: 65 саастарын туолбут уонна олоҕурбут ыарыылаах дьон дьиэлэригэр олоруохтаахтар, оттон үлэһиттэргэ, кыаллар буоллаҕына, тэйиччиттэн олорон үлэ салҕанар. Ону тэҥэ, биллэн турар, маасканы кэтии, дьонтон тэйиччи сылдьыы булгуччу тутуһуллуохтаах.
Суукка иһигэр 1028 анаалыс оҥоһуллубут. Пандемия саҕаланыаҕыттан барыта 900 тыһыынча анаалыс оҥоһуллубут. Саҥа дьыл кэнниттэн ыалдьыы ахсаана сыыйа намтаан иһэрэ бэлиэтэнэр.
Ангелина Васильева, “Саха сирэ” хаһыат, edersaas.ru
Хаартыска: интэриниэттэн