Олоҥхо Ыһыаҕар дьоҥҥо-сэргэҕэ, ыһыахчыттарга анаан тугу оҥорбуттарый?
Хас биирдии ыалдьыкка анаан олбох тикпиттэр, кыынньар кымыһы уонна мастан оҥоһуллубут, ыһыах сувенирын бэлэх ууннулар. Түгэхтэй алааһыгар түөрт чэпчэтинэр сир баар, уочарат суох, барыта саҥа тутуу, муостаҕа унитазтаах, уунан сайгыыр тэриллээх. Тахсан баран, илии суунар сирдээх. Бырдаҕы эмтээбиттэр, онон бэртээхэй.
Олоҥхону истэр балаҕаҥҥа, ураһаларга киирэн, итии чэйи иһиэххэ, арыылаах алаадьыны сиэххэ сөп. Тоҥмут дьон киирэн, олоҥхону истэ таарыйа, иттэн, өл хабан, үссэнэ түһэн абыраннылар. Элбэх сиргэ хаартыскаҕа түһэргэ анаан олоҥхоҕо сыһыаннаах фотозоналар оҥоһуллубуттар. Вай-фай ситимигэр босхо холбонуохха сөп. »Мегафон», »Билайн» хампаанньалар сибээһи күүһүрдэр тэриллэрин туруордулар.
Аһыыр сиргэ хорчуоппалар бары тус-туспа дьиэлээхтэр, аһыырга эрэ анаммыт, уһун остуоллаах, киэҥ олорор сирдээх тутуулар бааллар. Бу барыта дьон туһугар анаммыт дьаһаллар буолаллар. Үөһээ Бүлүүлэр, дьэ, ыһыахха бэлэмнэммиттэр эбит!
Ангелина Васильева, »Саха сирэ» хаһыат, edersaas.ru
Хаартыска: ааптар түһэриилэрэ.