Үөһээ Бүлүүгэ Олоҥхо ыһыаҕын ыалдьыттара улуус 20 үөрэҕин тэрилтэлэринэн олохсуйдулар.
Бу туһунан улуустааҕы үөрэх управлениетын салайааччыта Спиридон Бобуев: «Бүгүҥҥү күҥҥэ биһиги Үөһээ Бүлүүнэн, Намынан, Кэнтигинэн 2,5 тыһыынча киһини бэҕэһээ-бүгүн түһэрэ сылдьабыт», — диэн иһитиннэрдэ.
Бэрт элбэх ахсааннаах дэлэгээссийэлэри сүрүннээн үөрэх тэрилтэлэрин дьиэтигэр-уотугар түһэрдилэр. В.Д. Спиридонов аатынан 4 №-дээх оскуолаҕа 300-тэн тахса киһи кэлэн түстэ. Манна өрөспүүбүлүкэ хаһыаттарын, интернет-саайтарын суруналыыстара, «Саха» НКИХ айар үлэһиттэрэ уонна Нам улууһун 60-тан тахса киһилээх дэлэгээссийэтэ олоробут.
Юрий Кынатов дириэктэрдиир үс мэндиэмэннээх таас оскуолата 2013 сыллаахха тутуллан киирбит. Ол эрээри олох былырыын эрэ үлэҕэ киирбит курдук киэҥ-куоҥ, ып-ыраас оскуола.
Ыалдьыттарга бары усулуобуйа тэриллибит. Тэлэбиисэртэн саҕалаан, көрүдүөр аайы — иһэр уу тураллар. Иһирдьэ туалет, оскуола аттыгар – суунар сир. Эр дьон, дьахталлар киэҥ-куоҥ спорт уонна аактабай саалаларга түстүбүт.
Сарсыарда 8 чаастан саҕалаан сытар хосторбутун, көрүдүөрү хомуйан, сууйан-сотон бараллар. Тэхэньиичэскэй үлэһит Анна Иванова эппитинэн, 7 үлэһит үс этээһи кыраапыгынан үллэстэн хомуйалларын кэпсээтэ.
Нам улууһун Үөдэй нэһилиэгин Василий Зырянов аатынан «Сарыал» сынньалаҥ киинин уус-уран салайааччыта Геннадий Игнатьев: «Бөөлүүн айаннаан кэлэн, номнуо эрэпэтииссийэлэнэ сылдьабыт. Сарсыарда сып-сылаас уунан суунан-тараанан абыранныбыт. Уу-хаар өттүнэн барыта хааччыллыылаах. Бэрт усулуобуйа», — диэн санаатын үллэһиннэ.
Ити курдук, Олоҥхо ыһыаҕын ыалдьыттарыгар бары усулуобуйа тэриллэн, сынньанарга, үлэлииргэ, бырааһынньык тэрээһиннэригэр көхтөөхтүк кыттарга бары өттүнэн сөптөөх усулуобуйаны тэрийбиттэригэр өрөспүүбүлүкэтээҕи Олоҥхо ыһыаҕын бэлэмнээбит көстүбэт «фронт» салайааччыларыгар барҕа махталбытын тиэрдэбит!
Салгыы суруналыыс Елена Потоцкая устубут видеотын көрүҥ.
Үөһээ Бүлүүттэн Елена ПОТОЦКАЯ, «Саха сирэ» хаһыат.