Өрөспүүбүлүкэтээҕи суһал ыстаап салайааччытын солбуйааччы Ольга Балабкина бүгүҥҥү брифинг кэмигэр Саха сирин тас өттүгэр тахсааччыларга туһаайан эттэ. Ол курдук, доруобуйаларын туругун кэтэнэ сылдьалларыгар, кыратык да тумуу сибикитэ билиннэҕинэ, бырааһы ыҥыралларыгар сүбэлээтэ.
Кини эппитинэн, коронавирус “омикрон” диэн саҥа көрүҥэ дойду үрдүнэн номнуо “күүлэйдиир”. Олус түргэнник тарҕанар, сыстыганнаах. Билигин бары балыыһалар уонна “Роспотребнадзор” управлениета үрдүк бэлэмнээх эрэсиимҥэ олороллор.
Саха сиригэр пандемия саҕаланыаҕыттан, барыта 75 954 киһи коронавируһунан ыалдьыбыта бигэргэммит, мантан 20%-на оҕолор. Ыалдьыбыт дьон 96%-ра – быһыыны ылбатах дьон. Бүгүҥҥү күҥҥэ 72 358 киһи үтүөрбүт.
Билигин 525 245 киһи (улахан дьон 73,3%-на) коронавируснай инфекцияны утары быһыыны ылбыт. Тохсунньутааҕы уһун өрөбүл күннэргэ мэдиссиинэ тэрилтэлэригэр быһыыны биэрии өрөбүлэ суох ыытыллыаҕа.
Ахсынньы 30 күнүнээҕи туругунан, балыыһаларга 574 киһи “ковидтан” эмтэнэр, ол иһигэр 502 киһи орто ыарахан туруктаах, 60 киһи – ыарахан туруктаах. Бу 60 киһиттэн 58 киһи быһыыны ылбатах, ол эбэтэр 97%-ра). Реанимацияҕа сытар 12 киһи олоҕун туһугар быраастар күнүстэри-түүннэри охсуһаллар.
Ыалдьыы ахсаана намтаан эрэр да, Нерюнгригэ (14 киһи), Сунтаарга (16 киһи) балаһыанньаны суһал ыстаап хонтуруолга ылла.
Ангелина Васильева, “Саха сирэ” хаһыат, edersaas.ru