Доруобуйа Уопсастыба

Ыал дьоло — тупсаҕай тэлгэһэтигэр, тиэргэнигэр

Эдэр дьон ыал буолууларыгар кыыска олоҕун аргыһа халлаантан сулуһу да ылан биэриэн баҕарара баар суол.

edersaas.ru

Ол эрээри сулустааҕар саха балаҕана быдан ордуга чахчы. Үйэ аҥардаах үбүлүөйүгэр таптыыр кэргэниттэн тупсаҕай бэйэлээх балаҕаны бэлэх туппут дьоллоох дьахтар, бука, ахсааннаах буолуо.

                                                             

  Үбүлүөй бэлэҕэ – саха балаҕана

Амма улууһун Абаҕа нэһилиэгин олохтооҕо Роза Гоголеваҕа үбүлүөйдээх күнүгэр кэргэнэ Егор Алексеевич балаҕан бэлэхтээн үөрдүбүт.


Тапталлаах кэргэним өр сылларга ыраах айанныыр суоппарынан үлэлээбитэ. «Дальнобойщик» буолан, хоту улуустарга таһаҕас таһар этэ. Онтон урбаанын хайысхатын тутуунан, тимири иһэрдиинэн салҕаабыта. 2010 сыллаахха баһаарынай чааска үлэҕэ киирбитэ. 2018 сылтан саҥаттан бэйэ дьыалатын тэриммитэ. Маны таһынан уопсастыбаннай үлэҕэ олус көхтөөх киһи. Кини Абаҕа нэһилиэгэр эр дьон түмсүүтүн салайар.


Миэхэ анаммыт 49 кв. м иэннээх бэлэҕин аҕабыт 2014 сылга саҕалаабыта. 2015 сыл от ыйыгар аймахтарбытын кытта малааһыннаабыппыт.

Барытын саҕаланыаҕыттан бүтүөр диэри, дууһатын, санаатын ууран туран, бэйэтэ оҥорбута.

Кэргэним Егор Алексеевич тимиринэн, маһынан уһанар. Тимир олбуор ааннарын, ититэр тиһиги иһэрдэн оҥорорун таһынан, тутууга дэгиттэр мындыр уус.

Кини олохтоох уолаттары мунньан, биригээдэ тэринэн, ыччаты тутууга ымпыгар-чымпыгар тиийэ үөрэтэр, — диэн кэпсиир дьиэлээх хаһаайка.

Киһи тылынан эппэт кэрэ көстүүтэ

Сатабыллах хаһаайын диэх курдук, Егор Гоголев быйыл киһи сурунаалга да көрөн булбат харах сынньанар сайыҥҥы беседкатын тутан дьиэлээхтэрин үөрдүбүт.

Сайыҥҥы сынньанар дьиэ, нууччалыыта «беседка с гриль-комплексом» диэн эбит. Онон киһи сахалыы тылбаастаабакка итинник бэйэтинэн тиэрдэрэ ордук курдук.


Хайдах бу курдук ураннык тутуохха сөбүй? — диэн ыйыппыппар, Егор Алексеевич маннык хоруйдаата:


2 м ×60 см кээмэйдээх гриль оһох төрдө – уоту тутар кирпииччэ. Үөһэ өттө — тимир каркаас уонна кырааскаламмыт лиис. Алларатыгар бетон куппутум. Сайыҥҥы дьиэ буолан, «барбекю-гриль» уонна казааҥҥа ас буһарар оһох олус наадаалаах тэрил. Саас эрдэ, күһүн хойукка диэри манна аһыыбыт, сынньанабыт.


Кырдьык да, киһи тылынан эппэт кэрэ көстүүтүн хаартыскаҕа көрө олорон, төһө да бу кэмҥэ онно баар буолбатаргын, хараҕыҥ сымнаан, кутуҥ-сүрүҥ тохтуур, дууһалыын сынньанарга дылыгын. Гоголевтар дьиэ кэргэн сайыҥҥы тиэргэннэрин кыыстара оҕуруокка туттуллар эргэ буочукалары ойуулаан оҥорбута – кэрэ-нарын сибэккинэн туолбут тэлгэһэни өссө киэргэтэн, тупсаран биэрэргэ дылы.

Дьэ, онон, сатабыллаах Гоголевтар дьиэ кэргэннэрин тиэргэннэрин көрөн, киһи кырдьык да хараҕын сымнатар.

 

Елена ПОТОЦКАЯ, «Саха сирэ» хаһыат, edersaas.ru

Хаартыска — Гоголевтари дьиэ кэргэн архыыптарыттан.

3
0

Добавить комментарий