«Якутскэнерго» хампаанньа Өрөспүүбүлүкэтээҕи 2 №-дээх балыыһа ожоговай отделениетыгар аһымал көмөнү оҥордо. Хампаанньа бэйэтин үлэһитин быыһааһыҥҥа махтанан, тохсунньу 10 күнүгэр уокка сиэтиини утарсар кыраабаты (5 мөлүөйүөн суумалаах) уонна тирии лоскуйун уларытарга туһаныллар дерматом диэн медицинскэй тэрили бэлэх уунна.
edersaas.ru
Дьиҥэр, «Якутскэнерго» уонна Өрөспүүбүлүкэтээҕи 2 №-дээх балыыһа икки ардыларыгар аһымал көмөнү оҥорор туһунан дуогабар Саҥа дьыл иннинэ түһэрсиллибитэ. Ол гынан баран, кырабаат биир туоннаттан ордук ыйааһыннаах буолан, кырабааты аҕалыы федеральнай суолга кыһыҥҥы сырыы аһыллыар диэри кыаллыбатаҕа.
Абыраллаах кырабаат
Кырабаат оҥорор өҥөлөрүн көмөтүнэн, ыарыһаҕы эмтээн үтүөрдүү кэмэ хас да төгүл кыччаан биэрэр. Атыннык эттэххэ, ыарыһах бу кырабаакка сытан, ыйааһына суох буолар турукка киирэр. Тирии эчэйбит учаастага кырабааты кытары аалсыбатын кэриэтэ, ол түмүгэр баас оһоро түргэтиир. Быраас ыарыһах туругуттан көрөн, «ыйааһына суох буолар туругу» салайан биэриэн сөп.
Кырабаат төһө да ыарахан ыйааһыннааҕын иһин, миэстэтин чэпчэкитик уларытыахха, таһыахха сөп уонна үрдүгүн уларыта сылдьыахха сөп.
Ожоговай отделение төһө да улахан ноҕоруускалаахтык үлэлээтэр, 2017 с. ахсынньы 27 күнүгэр отделение үрүҥ халааттаах аанньаллара ыарыһах бэйэтин килиэккэтиттэн оҥоһуллубут тириини көһөрүү эпэрээссийэтин ситиһиилээхтик оҥорбуттара. Бу өрөспүүбүлүкэ медицинатыгар сүҥкэн ситиһиинэн сыаналаммыта. Ону тэҥэ СӨ Доруобуйа харыстабылын министиэристибэтин, ХИФУ уонна Вишневскай аатынан институт икки ардыларыгар холбоһуктаах бииргэ үлэлээһиннэрин үтүө түмүгүнэн сыаналанар.
Санатан эттэххэ:
2017 с. алтынньы 1 күнүгэр Дьокуускайдааҕы ГРЭС-кэ саахал тахсыбыта. Улахан саахалга «Якутскэнерго» үлэһитэ эмсэҕэлээбитэ. Кинини «суһал көмө» биригээдэтэ суһаллык Өрөспүүбүлүкэтээҕи 2 №-дээх балыыһаҕа аҕалбыта. СӨ Доруобуйа харыстабылын министиэристибэтэ ыарыһаҕы эмтээһини тус хонтуруолугар ылбыта.
Исписэлиистэр быһаарбыттарынан, эмсэҕэлээбит киһи этин уокка сиэтиитэ 65 % этэ. Ыксаллаах ыарыһаҕы эмтииргэ Өрөспүүбүлүкэтээҕи 2 №-дээх балыыһа бары отделениетын эмчиттэрэ кыттыбыттара. РФ Доруобуйа харыстабылын министиэристибэтин штаты таһынан кылаабынай комбустиолога, профессор А.А.Алексеевы кытары телемедицина көмөтүнэн сүбэ-ама ылбыттара.
Ожоговай отделение быраастара сэтинньи 13 күнүгэр ыарыһах туругун «ортонон» сыаналаабыттара. Ыарыһах 62 күн эмтэнэн, ахсынньы 1 күнүгэр балыыһаттан тахсыбыта.
Надежда ЕГОРОВА, «Саха сирэ» хаһыат, edersaas.ru