Дьокуускайга “Якутпромсервис” ХЭТ салайар хампаанньа көрөр-хааччыйар дьиэлэригэр анал кыраапык оҥорон, өҥө иһин иэһин хомуйда. Ол иннинэ эрдэттэн сэрэтэн, төлөбүрү хомуйа кэлэллэрин туһунан биллэриилэри ыйаабыттара. Кассир консьержтар хосторугар олорон төлөбүрү тутта.
Төлөбүрү хомуйууну маннык көрүҥүнэн ылыы олохтоохторго уонна салайар хампаанньаҕа бэйэтигэр туһалааҕа биллэр. Көһө сылдьар каасса үлэ кэнниттэн кэлэн төлөбүрү ылыыта, ону тэҥэ сааскы ириэрии кэмигэр табыгастаах буолла. Элбэх кыбартыыралаах дьиэ иһигэр баар анал муннукка иэстээхтэр испииһэктэрин кэмиттэн кэмигэр таһаараллар. Ол сэрэтии үлэ биир көрүҥэ буолар.
Оттон «Трансстрой» салайар хампаанньа Дьокуускайга биир бастакынан сылааһынан хааччыйыыга хаттаан ааҕыыны оҥорбутун, олохтоохтор сэргээтилэр. Урукку да сылларга биир бастакынан аахпыттарын бэлиэтииллэр. Бу хампаанньа атын хампаанньалартан уратыта диэн хааччыйар, көрөр-истэр дьиэлэрин таһын куруук ыраастык тутар, дьиэ таһын хомуйааччы үлэтин куруук хонтуруоллуур, хаары саас эрдэ таһар буоланнар, манна тиэргэн кирэ-хоҕо суох буолар, эрдэ куурар.
Салайар хампаанньалар үлэлэриттэн дьон олоҕун таһыма эмиэ тутулуктаах.
Бэлэмнээтэ Женни Стрюкова