Сайын бүтүүтэ өрөспүүбүлүкэ уһук сытар муннуктарыгар социальнай суолталаах ас бородууктатын тиксэриигэ түмүктэри таһаарар кэм буолар. edersaas.ru
Былаан туолар
«Якутоптторг» АУо иһитиннэрэринэн, бу сайын хоту улуустарга таһаҕаһы тиэрдии ситиһиилээхтик ааһан эрэр. 3494,9 туоннаны тиэйии былааннаммыт эбит буоллаҕына, атырдьах ыйын 24 күнүгэр «Якутоптторг» филиалларыгар 2908,2 туонна, ол эбэтэр уопсай хаһаас бородууктаттан 83,2% тиксэрилиннэ. Бурдук, курууппа, кэнсиэрбэ уо.д.а. социальнай суолталаах бородуукталар ыраах, куһаҕан суоллаах-иистээх нэһилиэнньэлээх пууннарга 14 ый устата барара былааннанар. Бу иннинэ тэрилтэ биир сылга суоттаммыт бородууктаны тиэйэрэ. Генеральнай дириэктэри бастакы солбуйааччы Василий Андросов этэринэн, социальнай суолталаах бородуукта барыахтаах кээмэйэ улааппыта тэрилтэ үбүгэр улахан охсуута суох эбит. Бастатан туран, бородууктаны атыылаһыы үлэтэ тэрээһиннээхтик ааспыт. Маныаха Ил Түмэн бигэргэппит сокуонунан бүддьүөттэн кирэдьиит ылбыттара көмө буолбут. Өссө Осетрово пуордуттан табаары уунан кэмигэр, туох да харгыһа суох аҕалбыттар.
Уунан уонна салгынынан таһабыт
Күн бүгүн хампаанньа өрөспүүбүлүкэ уһук түгэх сытар муннуктарыгар социальнай суолталаах бородууктаны тириэрдии иккис түһүмэҕин тэрийэн ыыта сылдьар. Билигин бородуукта тиийиэхтээх сиригэр 30% -тан тахсата тиксэриллэн турар. Ол курдук, Булун, Усуйаана, Абый уо.д.а. улуустарга барыта 278,7 туонна бородуукта тиийдэ. Дьааҥы, Индигииркэ, Халыма курдук өрүстэр биэрэктэринэн олорор нэһилиэнньэлээх пууннарга бородууктаны “ЛОРП” ААУо өрүс пуордун суудуналара тиэйэн илдьэллэр. Атырдьах ыйын бүтүүтэ сэттэ контейнердээх флот Белай Гора бөһүөлэгэр кэлэрэ былааннанар. Оттон кэлэр нэдиэлэҕэ алта контейнер бородууктаны тиэммит «Богатырев» теплоход Орто Халымаҕа уонна Зырянкаҕа айанныаҕа. Балаҕан ыйын 10 күнүгэр Черскэйгэ тиийиэхтээх таһаҕаһы «Туймаада Агроснаб» тэрилтэ «Магдебург» теплохода илдьиэҕэ. Социальнай суолталаах аһы салгынынан эмиэ тиксэрэллэр. Көтөр аалынан сымыыт, үүт, халбаһыы, оҕуруот аһа, фрукта курдук түргэнник буортуйар аһы ыыталлар. Холобура, Баатаҕай Алыытыгар түөрт туонна Дьокуускай фермердэрин хортуоппуйа тиксэрилиннэ. Маны сэргэ, «Якутоптторг» өссө 14 уһук хоту сытар нэһилэнньэни (Эйик, Кэбэргэнэ, Сыаҕаннаах уо.д.а. нэүилиэктэри) бородууктанан хааччыйда.
Атыы баазаларын тэрийиэхпит
Күн бүгүн хампаанньа атыы-тутуу ситимин тарҕатыыны тобулар. Ол курдук, Сунтаарга уонна Черскэйгэ саҥа улахан атыы баазаларын тута сылдьар. Манна хас биирдиилэрэ 600 туонна кээмэйдээхтэр, ааркалыы быһыылаахтар. Черскэйдээҕи бааза маҕаһыыннаах буолуоҕа. Урукку кэмҥэ бу бөһүөлэккэ тиийиэхтээх табаары “Зеленый мыс” диэн пуорка сүөккүүллэрэ. Оттон Сунтаар туһунан этэр буоллахха, онно баар ыскылааттар туруктара быстар мөлтөхтөр. Онон, саҥа баазалар үлэҕэ киирдэхтэринэ атыылаһааччыга табаар судургутук уонна түргэнник тиийэрэ саарбахтаммат.
Түргэн – ол аата удамыр сыана
Хоту улуустар олохтоохторун төгүрүк сыл устата сибиэһэй оҕуруот аһынан уонна фруктанан хааччыйар соруктаах «Якутопторг» тэрилтэ икки рефирижатордаах контейнеры атыыласпыта. Биирдэрэ түргэнник буорту буолар бородууктаны толору тиэнэн хайыы үйэ Зырянкаҕа, Орто Халымаҕа уонна Черскэйгэ айаннаабыта. Аны билигин төттөрү Дьокуускайга кэлээри, балык тиэнэ турар. Өрөспүүбүлүкэбит Ил Дархана Егор Борисов сорудаҕын толорон, бу контейнерынан быйыл уу халааныттан эмсэҕэлээбит Арҕахтаах, Сыбаатай, Березовка, Андрюшкино нэһилиэктэр олохтоохторугар сибиэһэй оҕуруот аһын илдьибиттэрэ. Иккис маннык контейнер бу күннэргэ Владивостоктан Дьокуускайга кэлиэҕэ. Кини Чокурдаахха уонна да атын Индигиир өрүс бөһүөлэктэригэр оҕуруот аһын таһыаҕа.
Халыма бөһүөлэктэригэр сибиэһэй оҕуруот аһын Магадан уобалаһын Сейчман бөһүөлэгиттэн тиксэрдилэр. Суол-иис кээмэйин уонна тиксэрии болдьоҕун кылгатыы суотугар бородуукта сыаната быдан чэпчиир. Ол курдук, холобура, Зырянка олохтоохторо хортуоппуйу уонна хаппыыстаны киилэтин сэттэ уоннуу солкуобайга ылар кыахтаннылар.
Тамара ИГНАТЬЕВА.