Быйыл хотугу улуустарга таһаҕаһы уунан тиэйиини “Якутоптторг” АУо икки сонун хайысханан тэрийдэ.
edersaas.ru
Бу туһунан «Якутопторг» тэрилтэ генеральнай дириэктэрэ Павел ФЕДОРОВ маннык билиһиннэрдэ:
— Бастакы туурга – Халыма улуустарын бөлөҕөр 2 643,2 т ас-үөл бородууктата тиэрдиллиэхтээх. Бу күннэргэ Халыма улуустарын бөлөҕүн филиалларыгар былааннаммыт 733,6 т бурдук туһааннаах сирдэригэр тиэйиллэн бүттэ.
«Колымская судоходная компания» хааччахтаммыт эппиэтинэстээх тэрилтэ Зырянкаҕа – 173,6 т, Черскэйгэ – 173,6 т бурдугу тиэртэ. От ыйын бүтэһик күннэригэр Орто Халыма улууһугар 386,4 т бурдугу тиэрдиэҕэ. Бүгүҥҥү күҥҥэ социальнай суолталаах аһы-үөлү тиэйиигэ “Якутоптторг” АУо бэйэтин филиалларыгар былааннаммыт таһаҕаһы тиэйиигэ сыллааҕы былаан 64 % туолла.
Бурдугу атыылаһыы “Новосибирскай-Владивосток-Магадан-Сеймчан” порда саҥа схеманы олоххо киллэриитин кытта ыкса сибээстээх. Быһа холуйан ааҕыынан, бу сонун сүүрээн 14 мөл.солк. бүддьүөт үбүн кэмчилээтэ. Маны таһынан социальнай бородуукта табаарын тиэйиигэ рефрижератор-контейнеры атыылаһыы төһүү өйөбүлүнэн буолла. Хоту сиргэ оҕуруот аһын уонна фруктаны сибиэһэйдии тиэрдии уустуктардаах. Рефрижератор-контейнердар көмөлөрүнэн уһук хоту улуустарга уу суолунан күүтүүлээх “күөх рейстэр” оҥоһуллан эрэллэр. Контейнер иһигэр сайын – сөрүүн, кыһын сылаас температура режимэ тутуллар. Рефрижератор-контейнеры массыынанан, поеһынан, уу аалынан тиэйэ сылдьыахха сөп. Кылаабынайа, салгын аалынан тиэрдэрдээҕэр табаар сыаната биллэ удамыр. Бу күннэргэ оҕуруот аһын тиэммит контейнер Владивостоктан Магадааҥҥа тиийэн, Сеймчаанынан Орто Халыма куоратыгар тохтоон, Черскэй бөһүөлэгин туһаайыытын тутуһуохтаах.
Иккис туурга арктическай уонна хотугу улуустарга ыытыллыахтаах 851,7 т бородуукта Дьокуускайга уонна Аллараа Бэстээххэ турар контейнердарга тиэллэ турар. Ол курдук, былааннаммыт табаар Аллайыаха, Булуҥ уонна Усуйаана улуустарыгар тиэрдэргэ бэлэм.
Онон быйыл социальнай табаары тиэйиигэ “Якутоптторг” АУо үлэтин тэтимнээхтик уонна саҥа тосхолу толкуйдаан олоххо киллэрэн эрэр. Саҥа уларыйыыны хоту дойду олохтоохторо аны күһүн оҕуруот аһын удамыр сыанатыттан билиэхтэрэ.
Елена ПОТОЦКАЯ, «Саха сирэ» хаһыат, edersaas.ru