Усуйаана оройуонун саамай уһук нэһилиэгэ Дьүкээгир Лаптевтар муораларын кытылыттан чугас сытар. 120-тэн эрэ тахса киһи олорор бөһүөлэгэр кыһыҥҥы суолунан эрэ айан-сырыы олохтонор. Ону даҕаны Уус Куйгаттан Хаһааччыйаны уонна Аллараа Дьааҥыны нөҥүөлээн.
edersaas.ru
Айан-сырыы ыарахаттарыттан чаҕыйбакка, «Якутоптторг» тэрилтэ сыл ахсын бородууктаны Дьүкээгиргэ эрэ буолбакка, өрөспүүбүлүкэ ыраах сытар нэһилиэнньэлээх пууннарыгар тириэрдэр.
Быйыл Дьүкээгиргэ таһаҕаһы хас да массыынанан тиэйэн аҕалбыттара, ол иһигэр аһы-үөлү, оттугу, уматыгы, тутуу матырыйаалын уонна да атын таһаҕаһы. Күн-дьыл туран биэрдэҕинэ Дьүкээгиргэ диэри 4 суукканан айаннаан тиийэллэр. Оттон хаар түстэҕинэ, тибии типтэҕинэ айан тардыллан, уһуур-кэҥиир. Дьүкээгиргэ таһаҕас сылга биирдэ эрэ тиэллэр буолан, олох эрдэттэн бэлэмнэнэллэр.
Быйыл «Якутоптторг» таһаҕаһын Депутатскай бөһүөлэгин урбаанньыта Тотраз Хадонов массыыналарынан тириэртэ. Ыам ыйын 3-с күнүгэр таһаҕаһы тиэммит массыыналар Аллараа Дьааҥыттан аттаммыттара, оттон 8-с чыыһылаҕа тустаах сиригэр тириэрдэннэр, төттөрү айаннаабыттара.
«Якутоптторгтар» Дьүкээгир олохтоохторун 13,1 туонна бородууктанан, ол иһигэр бурдугунан, саахарынан, куруппанан, тууһунан, үүнээйи арыытынан, үүт уонна эт кэнсиэрбэтинэн, мокоруон оҥоһуктарынан хааччыйдылар.
Тамара Игнатьева, edersaas.ru сайтка анаан